Աշխարհահռչակ «Անոնիմուս» հաքերային կազմակերպությունը հարձակում է գործել Թուրքիայի որոշ նախարարությունների և հասարակական կազմակերպությունների պաշտոնական կայքերի վրա: Այս մասին հաղորդում է «Արմենպրես»–ը` վկայակոչելով թուրքական Anadolu գործակալությունը:
«Անոնիմուս»-ը փորձել է կոտրել Թուրքիայի Արդարադատության, Ներքին և Արտաքին գործերի նախարարությունների, ինչպես նաև Անվտանգության խորհրդի պաշտոնական կայքերը: Շուրջ երկու ժամ տևած գործողության արդյունքում հաքերային կազմակերպությունը չի կարողացել հասնել իր նպատակին:
Թուրքական աղբյուրների համաձայն` նախարարությունների պաշտոնական կայքերը հարձակման արդյունքում չեն տուժել:
Այս տարվա սկզբին Anonymous հաքերային խմբավորումը հայտարարել էր թուրքական պաշտոնական կայքերի դեմ պատժիչ գործողություններ սկսելու «Հայոց ցեղասպանություն» գործողության վերագործարկման մասին: Հիմք ընդունելով խմբավորման կողմից տարածվող տեսահաղորդագրությունը` աշխարհի ամենահայտնի հաքերները նշել են, որ #OpArmGenocide-ը ժամանակավորապես կասեցվել էր` կապված մի շարք այլ գործողությունների սկսման հետ: Տեսանյութը սկսվում է պատմական ակնարկով թուրքերի կողմից իրականացված բարբարոսությունների մասին, ապա ընդգծվում. «Հարձակումները կրկնվելու են մեկ տարի, երկու տարի`մինչև Թուրքիան պաշտոնապես ընդունի իր մեղավորությունն ու պատասխանատվությունը»:
Leave a Reply