Ցեղասպանությունը «թուրք»ացրել է նաև հայերի ունեցվածքը

Քրդական «Ֆըրաթ» լրատվական գործակալությունն անդրադարձել է Հայոց ցեղասպանության ժամանակ բռնագրավված հայկական գույքի հարցին:

Ըստ աղբյուրի` Հայոց ցեղասպանությանն առնչվող խնդիրներից մեկն էլ, որի մասին ընդհանրապես քիչ է խոսվում, հայերից բռնագրավված ունեցվածքն է. «Միություն և առաջադիմություն կուսակցության կադրերը բռնագրավել են հայերի` Ցեղասպանությունից մնացած գույքի մի մասը, մյուս մասն էլ նախ` անցել է պետական գանձարանին, այնուհետև` վաճառվել: Այսօրվա հարցը հետևյալն է. ո՞վ/ովքե՞ր են ներկայում վայելում հայերի հարստությունը:

Ապրիլի 24-ն այն օրն է, որով սկսվել է Հայոց ցեղասպանությունը, որի պատճառով մեկ ու կես միլիոն հայեր են սպանվել Անատոլիայում: Ստամբուլում 220 հայ մտավորականների` գնացքով Չանքըրը և Այաշ աքսորով մեկնարկած Ցեղասպանության ընթացքում ոչնչացված մեկ ու կես միլիոն հայերի գերեզմաններն անգամ հայտնի չեն:

Միություն և առաջադիմություն կուսակցության կողմից որպես «էթնիկ զտման» ծրագիր շրջանառության մեջ դրված Ցեղասպանության հանգամանքներից մեկն էլ դարձավ հայերի թողած ունեցվածքի բռնազավթումը:

«Լքյալ գույք» հորջորջված այդ ունեցվածքը կիսվել է իթթիհատական կադրերի և տեղացի ավագանու միջև: Էթնիկ զտման ամենաէական հետևանքներից մեկն էլ եղել է գույքի բռնագրավումը և ունեցվածքի «թուրք»ացումը:

Տվյալ ժամանակաշրջանի պարբերականներում հրապարակված նահանգային ֆինանսական վարչության (defterdarlık) և դատարանների հայտարարություններում բացահայտ կերպով նշված է, թե ովքեր են բռնագրավել այդ գույքը, և ինչպես է այդ ունեցվածքը վաճառվել կամ վարձու տրվել պետության անունից:

Բռնազավթված տարածքների մի մեծ մասն էլ գտնվում է Մարդինում, որտեղ հրապարակված «Ուլուս սեսի» («Ազգային ձայն») թերթի էջերում կարելի է հաճախ հանդիպել վերոհիշյալ հայտարարությունների: Ժամանակաշրջանի պարբերականներում նահանգային ֆինանսական վարչության կողմից ներկայացված հայտարարություններում նկատվում է, որ «Մըքսը Մըհը Դոքմաք, Քըրաթհաքի դուստր Մերո, Ջիրջի Քոչհիսազլը, Օսե Սահիփ, Մելքիի որդի Աբդալո գյավուր» անվան տակ Ցեղասպանությանը զոհ գնացած հայերին պատկանած տներն ու արտերը վաճառվել են աճուրդի միջոցով: Միևնույն հայտարարություններում հաճախ է աչքի զարնում «գանձարանին անցած» արտահայտությունը: Եկեղեցական գույքն անգամ դատական որոշմամբ վաճառքի է հանվում` թերթում հրապարակված հայտարարության միջոցով»:

Akunq.net