Արևմտյան Հայաստանի ազգային խորհրդի պատասխանը «Ռադիկալ»–ի հոդվածին

Արևմտյան Հայաստանի հայերի ազգային խորհուրդը (նստավայր Փարիզ-խմբ.) հայտարարություն է տարածել, որով արձագանքում է «Ռադիկալ» օրաթերթում տպագրված (Tert.am, 10:52 • 10.04.2012) թուրք լրագրող, հրապարակախոս Օրհան Քեմալ Ջենգիզի հոդվածին` նկատելով, թե Թուրքիան բազմաթիվ ու բազմազան ձևեր է կիրառում «հայության զարկերակը շոշափելու համար, դրանցից մեկն էլ «Ռադիկալ» օրաթերթում տպված թուրք լրագրողի հոդվածն է»:

Հայտարարության մեջ նշվում է, որ «Հոդվածագիրը` թուրք լրագրող, հրապարակախոս Օրհան Քեմալ Ջենգիզը, գտնում է, որ «միջազգային որեւէ դատարան Հայկական Հարցի շրջանակում Թուրքիայի Հանրապետությանը չի կարող մեղավոր ճանաչել»:
Ապա հակադարձում.«Արժե հոդվածագրին հարցնել՝ ինչո՞ւ այդպես միանշանակ, իսկ ո՞վ է Օսմանյան Թուրքիայի իրավահաջորդը, կամ ո՞վ չգիտի, որ Ցեղասպանության հանցագործության նկատմամբ վաղեմության ժամկետ չի կիրառվում, ինչը նշանակում է, թե ներկայիս Թուրքիայի Հանրապետությունը, որպես Օսմանյան Թուրքիայի ժառանգորդ, պատասխանատու է 1894-1923 թթ. երեք թուրքական` օսմանյան, երիտթուրքական, քեմալական, կառավարությունների կողմից իրականացված մարդատյաց, ռասիստական ու հայատյաց քաղաքականության համար, որի համար և պետք է հատուցի»:

«Հայոց ցեղասպանությունը չի սահմանափակվում 1915-ով: Եթե թերթելու լինենք վերջին 150 տարիների պատմությունը, ապա վեր կհառնեն 1894-1896-ի` Կիլիկիայի, 1909-ի` Ադանայի կոտորածները, 1915-17 թթ.` Արեւմտյան Հայաստանի, Կիլիկիայի եւ Օսմանյան կայսրության ողջ տարածքում իրականացված հայերի համապարփակ ցեղասպանությունը, 1918-23 թթ.` կոտորածները, ջարդերն ու բռնագաղթը»,– ասվում է ԱՀ ազգային խորհրդի հայտարարության մեջ։

Անդրադառնալով այն փաստին, որ թուրք հրապարակախոսն իր հոդվածում կենտրոնանում է միայն բարոյական եւ ֆինանսական փոխհատուցման հարցի վրա` մոռացության մատնելով, որ կա ավելի առաջնային խնդիր` տարածքային` Արեւմտյան Հայաստանը, ներառյալ Կիլիկիան, ԱՀ ազգային խորհուրդը հիշեցնում է.« 1920 թվականի նոյեմբերի 22-ին ԱՄՆ 28-րդ նախագահ Վուդրո Վիլսոնը վավերացրեց «Հայաստանի եւ Թուրքիայի միջեւ սահմանի մասին» Իրավարար վճիռը, ինչի մասին դժվար թե «Ռադիկալի» հոդվածագիրը չիմանար»:

Թուրք հրապարակախոսն իր հոդվածում բարձրացնում է նաև «անհատական փոխհատուցման խնդիրը», ինչին ԱՄ խորհուրդը պատասխանում է այսպես. «Ի՞նչ անհատական փոխհատուցման մասին է խոսքը, մի՞թե թուրքերը հայերին իրենց տներից դուրս են հրավիրել` համոզելով վերցնել անձնական փաստաթղթերը: Ո՞ր անհատին են փոխհատուցելու, նրան, ում Դեր-Զորի ճանապարհին գլխատեցի՞ն, թե չծնված երեխաներին, թոռներին ու ծոռներին…»։

«Անհատական փոխհատուցման խնդիրը ևս մեծ կեղծիք է` մեծ հանցագործությունը շրջանցելու նպատակով: Հանցագործությունն իրականացվել է ժողովրդի նկատմամբ, ուստի փոխհատուցումն էլ ժողովրդինն է»,- եզրափակում է Արևմտյան Հայերի ազգային խորհուրդը։

http://tert.am/am/news/2012/04/26/statement/