Էրդողանի կուսակիցը ներողություն է խնդրել հայերից

Թուրքիայի իշխող «Արդարություն և զարգացում» կուսակցության հիմնադիր անդամներից Իսմեթ Ուչման, 1915 թվականի դեպքերն անվանելով իթթիհատականների կողմից իրականացված «ցեղային աքսոր», «անձամբ» ներողություն է խնդրել հայերից: Այս մասին հաղորդում է «Արմենպրես»-ը` վկայակոչելով թուրքական «Միլլիեթ» պարբերականը:

Ուչմանը հայտարարել է, որ քսաներորդ դարասկզբին Թուրքիայում տեղի ունեցած դեպքերի պատասխանատուն ոչ թե ներկայիս իշխանություններն են, այլ` երիտթուրքական «Իթթիհատ վե թերաքքի» կուսակությունը: «Անհրաժեշտ է, որպեսզի կարողանանք ասել. «Մենք անցյալում տեղի ունեցած որոշ դեպքերի համար ներողություն ենք խնդրում ձեզանից»: Այս ներողությունը ես խնդրում եմ անձամբ` այդ «ցեղային աքսորի» համար»,- ասել է նա:

Անդրադառնալով փոխհատուցման խնդրին` իշխող կուսակցության անդամը հայտարարել է, որ դա բավականին բարդ հարց է, որի լուծումն անհայտ է: Ուչման նշել է, որ անհրաժեշտ է, որպեսզի հայկական և թուրքական պետությունները ձեռք ձեռքի տան, քանի որ միայն այս ճանապարհով հնարավոր կլինի հարցը լուծել:

«Անհնար է հայ ժողովրդին առանձնացնել հայերից: Նրանց ցավը մեր ցավն է: Ոչ ոք արտոնյալ չէ: Անհրաժեշտ է բաց լինել քննադատության համար»,- ասել է «Արդարություն և զարգացում» կուսակցության անդամը:

http://armenpress.am/arm/news/689222/erdoxani-kusakicy-neroxutyun-e-khndrel-hayeric.html