Հայոց ցեղասպանության ոգեկոչում Սանկտ Պետերբուրգում

Ապրիլի 22-ին Ռուսաստանի հյուսիսային մայրաքաղաքում` Սանկտ Պետերբուրգում, մեկնարկեց Հայոց ցեղասպանության անմեղ զոհերի ոգեկոչման միջոցառումների շարքը:

Ինչպես հայտնում է Սանկտ Պետերբուրգում Akunq-ի թղթակից Անահիտ Քարտաշյանը, Ապրիլի 22-ին Սանկտ Պետերբուրգի և Լենինգրադի շրջանի հայերը բողոքի ցույց անցկացրեցին Թուրքիայի հյուպատոսարանի առջև:

Բողոքի ցույցը նպատակ ուներ հասարակության լայն զանգվածներին տեղեկացնել և հիշեցնել Օսմանյան կայսրությունում 20-րդ դարի սկզբին տեղի ունեցած ցեղասպանության` պատմական հայրենիքում հայ ժողովրդի և նրա մշակույթի ու կոթողների բնաջնջման մասին:

Բողոքի ցույցին Ցեղասպանությունը դատապարտող ելույթով հանդես եկան Սանկտ Պետերբուրգի մտավորականներ, հասարակական գործիչներ: Ցույցին իր մասնակցությունն ունեցավ նաև ՌԴ Օրենսդիր խորհրդի պատգամավոր «Յաբլոկո» կուսակցության անդամ Բորիս Վիշնևսկին: Ցույցի վերջում մասնակիցների ստորագրությամբ դիմումը հանձնվել է Թուրքիայի հյուպատոսարանին:

Ոգեկոչման արարողությունների շարքը շարունակվել է ապրիլի 24-ին: Ինչպես հայտնում է Սանկտ Պետերբուրգի «Նոր սերունդ» հայկական երիտասարդական կազմակերպությունը, ապրիլի 24-ին` ժամը 16:00, Սանկտ Պետերբուրգի Սուրբ Եկատերինա հայկական եկեղեցում անմեղ զոհերի հիշատակին մատուցվել է պատարագ, որից հետո ժամը 17:00-ին Նևսկի պողոտայով երթ է անցկացվել, որի ընթացքում երթի մասնակիցները բաժանել են տեղեկատվական բուկլետներ: Երեկոյան 19:00-ին Սմոլնի տաճարում տեղի է ունեցել «Սայաթ Նովա»  ժողովրդական անսամբլի (Հայաստան) և երիտասարդական սիմֆոնիկ նվագախմբի համերգը, որտեղ ելույթով հանդես է եկել փոխնահանգապետը:

Սանկտ Պետերբուրգ

Akunq.net