Թուրքիան չի կարող Եվրոպայի մաս կազմել` առանց ճանաչելու Հայոց ցեղասպանությունը: Այդ մասին լրագրողների հետ զրույցում ապրիլի 24-ին հայտարարել է Հայաստանում Գերմանիայի արտակարգ եւ լիազոր դեսպան Հանս Յոհան Շմիդտը:
Գերմանական դիվանագիտական առաքելության ղեկավարն այցելել է Հայոց ցեղասպանության զոհերի հուշահամալիր եւ ծաղկեպսակ դրել:
«Եթե Թուրքիայի կառավարությունը ցանկանում է ապագա կառուցել, ապա պետք է խոստովանի մեղքը, ինչպես դա ժամանակին արեց Գերմանիան», – ընդգծել է դեսպանը: Նրա խոսքով` թուրքերի այսօրվա սերունդը մեղավոր չէ Հայոց ցեղասպանության մեջ, բայց այն պետք է պատասխանատվության զգացում ունենա իր նախնիների գործածների համար:
«Եվրոպայում գոյություն ունի հիշողության մշակույթ, եւ եթե Թուրքիան ուզում է դառնալ Եվրոպայի մաս, ապա պետք է ճանաչի Հայոց ցեղասպանությունը: Այն փաստը, որ ժամանակին Հիտլերը հայտարարում էր` «Ո՞վ է այսօր հիշում հայոց ցեղապանության մասին», վկայում է, որ անպատժելիությունը ծնում է նոր հանցագործություններ», – ընդգծել է Հանս Յոհան Շմիդտը:
20-րդ դարասկզբին Օսմանյան Թուրքիայում կոտորվել է 1,5 միլիոն հայ: Ապրիլի 24-ը, օր, երբ 1915 թվականին Կոստանդնուպոլսում ձերբակալվել էր եւ մահապատժի ենթարկվել հայկական ամբողջ մտավորականությունը, դարձել է Հայոց ցեղասպանության զոհերի հիշատակի ավանդական օրը: Հայոց ցեղասպանությունը պաշտոնապես ճանաչել եւ դատապարտել են Ուրուգվայը, Ֆրանսիան, Իտալիան, Գերմանիան, Բելգիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Կիպրոսը, Սլովակիան, Արգենտինան, Կանադան, Վատիկանը, Լիբանանը, Չիլին, Շվեդիան եւ մի շարք այլ պետություններ:
Հայոց ցեղասպանությունը պաշտոնապես ճանաչել եւ դատապարտել են նաեւ ԱՄՆ-ի 50 նահանգներից 42-ը, որոնք ապրիլի 24-ը հայտարարել են Հայոց ցեղասպանության զոհերի հիշատակի օր, նմանատիպ որոշումներ են կայացրել նաեւ Ուելսը, Շոտլանդիան, Իռլանդիան եւ Ավստրալիան: Ռուսաստանը երկու անգամ պաշտոնապես հայտարարություն է ընդունել Հայոց ցեղասպանությունը դատապարտելու մասին: Ամեն տարի ապրիլի 24-ին հայ ժողովրդին է դիմում նաեւ ԱՄՆ-ի նախագահը:
Leave a Reply