Հայաստանը սկսել է ավելի լրջորեն վերաբերվել Հայոց ցեղասպանության համար Թուրքիայից փոխհատուցման խնդրին: Այդ մասին հայտարարել է ԳԱԱ Արեւելագիտության ինստիտուտի տնօրեն Ռուբեն Սաֆրաստյանը` ապրիլի 23-ին կայացած «Ժամանակը չի մաքրում հիշողությունը» հեռուստակամուրջի ընթացքում:
Փորձագետի խոսքով` փոխհատուցման հարցը քննարկվում է հասարակության մեջ ավելի լուրջ, քան նախկինում, եւ այդ կարծիքը կիսում են նաեւ գիտական շրջանակներում: Ընդ որում, ըստ Սաֆրաստյանի, Թուրքիայում, արդեն մի քանի տարի, գործում է հատուկ խումբ, որի կազմում ընդգրկված են տարբեր գերատեսչությունների ներկայացուցիչներ, այդ թվում` հետախուզությունից, միջազգային իրավունքի մասնագետներ, որոնց խնդիրն է արձագանքել, երբ Հայաստանը հանդես գա փոխհատուցման պահանջով:
Միեւնույն ժամանակ, փորձագետը զերծ է մնացել կոնկրետացնել, թե որքան է լինելու փոխհատուցումը: Աբստրակտ ասած` դա կարող է լինել բարոյական, քաղաքական, ֆինանսական, տարածքային փոխհատուցում, ասել է Սաֆրաստյանը` հավելելով, որ պետք է միջազգային հանձնաժողով ստեղծվի: Ռուսաստանցի փորձագետ Անդրեյ Արեշեւի խոսքով` փոխհատուցում ստանալն այնքան էլ անիրատեսական չէ: «Եթե համալիր եւ հետեւողականորեն մոտենանք»,- ասել է փորձագետը` նշելով, որ թուրքական լրատվամիջոցներում եւս քննարկվում է այդ հարցը:
Leave a Reply