Ֆրանսիայի Մոնբելյար քաղաքի դպրոցներից մեկում պատմության դասագրքում Թուրքիայի և հայոց ցեղասպանության մասին ծաղրանկարը մեծ աղմուկ է առաջացրել Թուրքիայում:
Փարիզում Թուրքիայի դեսպանատունը բողոքի նոտա է ուղարկել երկրի արտգործնախարարությանը: Դեսպանատունը նաև Ֆրանսիայի կրթության նախարարությանը նամակ է ուղարկել` հայտնելով իրենց մտահոգությունը` միջադեպի կապակցությամբ:
Ինչպես տեղեկացնում է «Հյուրիյեթ»-ը, Եվրոպայի թուրք լոբբիստները ևս քայլեր են ձեռնարկել և դպրոցի տնօրենից բացատրություն են պահանջել: Դպրոցի տնօրենն արդարացել է` ասելով, որ ծաղրանկարը գրքում տեղադրված չէ, պարզապես դասի ընթացքում ուսուցիչը բաժանել է նկարներն ու խնդրել մեկնաբանել այն:
«Ֆրանսիան 2001-ին ճանաչել է Հայոց ցեղասպանությունը, և դրանից հետո ֆրանսիական դպրոցներում սովորող թուրք աշակերտները պարբերաբար նման խնդիրներ են ունենում»,- գրում է «Հյուրիյեթը»:
Ծաղրանկարում «Թուրքիայի» ուսերին «ցեղասպանությունը» կա, և նա ոչ մի կերպ չի կարողանում հասնել Եվրամիությանը: Պատմության և աշխարահագրության ուսուցչուհին, բաժանելով ծաղրանկարները, հարցրել է. «Այս ծաղրանկարի համաձայն ինչո՞ւ Թուրքիան չի կարող միանալ Եվրամիությանը»:
Դասարանում գտնված թուրք աշակերտները զայրացած հակաճառել են ուսուցչին` ասելով, թե թուրքերին մեղադրում են չարած հանցանքների համար:
«Եթե ձեզ Ալժիրի մասին հարցնեին, ինչպե՞ս կարձագանքեիք»,- ասել է նրանցից մեկը:
Leave a Reply