Երևանի կենտրոնում կտեղադրվի Ասորիների ցեղասպանության հուշարձան

«Աբդուլ-Համիդի ժամանակներում և Առաջին համաշխարհային պատերազմի ժամանակ Թուրքիայում բազմահազար ասորիներ են կոտորվել»,-այսօր լրագրողների հետ հանդիպմանն անդրադառնալով Օսմանյան Թուրքիայում ասորիների ցեղասպանության թեմային` ասաց ԳԱԱ գիտաշխատող Անահիտ Խոսրոևան:

Շվեդիայի խորհրդարանը 2010թ. ճանաչել է հայերի, ասորիների ցեղասպանությունը և, ըստ Խոսրոևայի, այս պահին աշխատանքներ են կատարվում Ավստրալիայում` ասորիների ցեղասպանության ճանաչման համար:

Իր հերթին «Աթուռ» ասորական կազմակերպության նախագահ Արսեն Միխայլովը նշեց, որ ապրիլի 25-ին Մոսկովյան-Նալբանդյան խաչմերուկում կբացվի ասորիների ցեղասպանությանը նվիրված հուշարձան, և բազմաթիվ ասորիներ կժամանեն ՀՀ:

Ըստ Ասորիների միության նախագահ Ռազմիկ Խոսրոևի` ասորիները շնորհակալ են ՀՀ իշխանություններին` ասորիների նկատմամբ իրենց վերաբերմունքի համար, և ապրիլի 25-ը ասորիների համար շատ կարևոր օր է:

Ասորիների միության նախագահը հույս հայտնեց, որ նոր գումարման ԱԺ-ն կճանաչի ասորիների և հույների ցեղասպանությունը:

Խոսրոևը նշեց, որ ասորական դպրոցները և, ընդհանրապես, ասորիների հետ կապված կրթական ամբողջ ոլորտը ֆինանսավորվում է ՀՀ կառավարության կողմից:

ՀՀ-ում պաշտոնական տվյալներով բնակվում են 5.000 ասորիներ, իսկ ոչ պաշտոնական տվյալներով` մոտ 7.000:

http://www.aysor.am/am/news/2012/04/20/asori/