Ամերիկյան պարբերականը կոչ է անում Հայոց ցեղասպանությունն աշխարհին ներկայացնել նոր մոտեցմամբ

Հայոց ցեղասպանության վերաբերյալ ֆիլմերը եւ միջոցառումները պետք է լինեն մշակութային հենքի վրա, այլ ոչ թե պատմական, իսկ արվեստագետները նոր ստեղծագործական մոտեցումներ պետք է ցուցաբերեն: Ինչպես հաղորդում է «Արմենպրես»-ը, ամերիկյան Daily Bruin պարբերականը գրում է, որ Լոս Անջելեսի Համմեր թանգարանի առաջիկա ծրագրերը փորձելու են այս մոտեցումներն իրականացնել մի շարք միջոցառումների միջոցով, որոնք Հայոց ցեղասպանության պատմության մասին լինելու են ավելի շատ մշակութային եւ արտիստիկ բնույթի, քան պատմական: Այս առիթով Ատոմ Էգոյանի «Արարատ» ֆիլմը, որպես նմանատիպ ֆիլմի լավագույն օրինակ,  կցուցադրվի միջոցառումների Համմեր թանգարանի ծրագրերի շարքի ժամանակ` ապրիլի 16-ին: Այն կհաջորդի Կարլա Կարապետյանի «Ճչացողները» փաստագրական ֆիլմի ցուցադրությանը: Էգոյանի խոսքով` Ֆիլմում ինքը պարզապես փորձել է խուսափել պատմական իրադարձությունները ներկայացնելուց: «Արարատ»-ը ֆիլմ է Հայոց ցեղասպանության վերաբերյալ ֆիլմ նկարահանելու մասին: «Ինձ համար հետաքրքիր էր նկարահանելիս ուսումնասիրել, թե ինչպես կարող է անմարդկային եւ սարսափ տեսարանների վերստեղծումը  հավերժացնել մարդկանց զայրույթը եւ ատելությունը»,- նշել է Էգոյանը:

Ռեժիսոր Կարլա Կարապետյանի «Ճչացողները» փաստագրական ֆիլմը վերանայում է Ցեղասպանության հավերժությունը, որտեղ նկարահանվել է System of a Down ռոք խմբի մենակատար Սերժ Թանկյանը: «Մենք ֆիլմում հայտնվել ենք` պատմելու Հայոց ցեղասպանության մասին եւ բարձրացնելու ամբողջ աշխարհում այն ճանաչելու խնդիրը»,-նշել է Թանկյանը: Էգոյանը եւ Թանկյանը  միասին նաեւ կմասնակցեն Համմեր թանգարանի կազմակերպած ապրիլի 22-ի նախագծերի շարքին: «Մեզ անհրաժեշտ է պատմել պատմությունը տարբեր ժամանակաձեւերով` օգտագործելով անցյալը, ներկան եւ ապագան»,-ընդգծել է Ատոմ Էգոյանը:    

http://armenpress.am/arm/news/688088/