Ստամբուլի Բեյքոզ շրջանում գտնվող Սուրբ Նիկողայոս հայկական եկեղեցու վաքըֆը շահել է Ստամբուլի քաղաքապետարանի դեմ հարուցած իր դատը, որով պահանջվում էր վերադարձնել 37.500 քմ այն հողատարածքը, որում ընդգրկված էր նաև հայկական գերեզմանոցը: Այդ մասին հաղորդում է թուրքական «Սաբահը»:
Ըստ աղբյուրի, թուրքական կառավարության` փոքրամասնությունների գույքի վերադարձի վերաբերյալ օրենքի դրույթում տեղ գտած որոշման համաձայն, նրանց գույքը վերադարձվում է Վաքըֆների գլխավոր տնօրինության և փոքրամասնությունների վաքըֆների միջև եղած արձանագրությունների միջոցով: Դրա վերջին օրինակն է Ստամբուլի քաղաքապետարանի և Բեյքոզի Սուրբ Նիկողայոս հայկական եկեղեցու վաքըֆի միջև դատական գործի հանգուցալուծումը, ըստ որի` դատարանը որոշել է գույքի սեփականության վկայագիրը գրանցել հայկական վաքըֆի անունով: Վաքըֆի նախագահ Վարուժան Մաղաթյանը նշել է. «Սա մի որոշում էր, որին սպասել էինք տարիներով: Ստամբուլի քաղաքապետարանը բողոքարկելու է դատարանի որոշումը, սակայն կարծում ենք, որ Վճռաբեկ դատարանը ևս մեր օգտին որոշում կկայացնի»:
Սույն տարածքը, որը բարեկարգելու թույլտվություն չեն տալիս, որպես ժամանցի վայր է օգտագործվում ներկայում:
Akunq.net
Leave a Reply