Բրիտանացի հրապարակախոսը մեկ ու կես միլիոն թուրքերի կոչ է անում պայքարել հանուն Հայոց ցեղասպանության ճանաչման

Բրիտանացի հրապարակախոս, հայազգի Օդետ Բազիլը կոչ է անում մեկ ու կես միլիոն թուրքերի պայքարել 1915 թվականին  Օսմանյան կայսրությունում հայերի նկատմամբ իրականացված ցեղասպանության ճանաչման համար: «Եթե յուրաքանչյուր զոհված անմեղ հայի համար մեկ թուրք կատարի բարի գործ` պահանջելով Թուրքիայից Հայոց ցեղասպանության ընդունում, ապա մեկ ու կես միլիոն թուրք կհարգի զոհերի հիշատակն ու կվերականգնի պատմական ճշմարտությունը»,-«Արմենպրես»-ին տրամադրած հաղորդագրության մեջ այս մասին է գրում Բազիլը` ընդգծելով, որ դրանով Թուրքիան եւ իր ժողովուրդն առավելություն ձեռք կբերի ժողովրդավարության եւ մարդու իրավունքի պաշտպանության հարցում` Եվրամիություն մուտք գործելու համար:

Բրիտանացի հրապարակախոսը կոչ է անում թուրքերին` որքան հնարավոր է շուտ դարձի գալ ու սկսել այդ գործընթացը:

Այս կոչը նա գրել է նամակում, որտեղ պատմում է` ինչպես իր որդին առաջին անգամ ծանոթացավ թուրքերի կողմից հայերի նկատմամբ իրականացված ոճրագործության պատմությանը:

«Որոշեցի յոթնամյա  որդուս իր մեծ եղբայրների` Ռոբերտի ու Էդվինի հետ ուղարկել  Թեհրան` հայազգի ամուսնուս ծնողների մոտ` հայերին ավելի մոտ գտնվելու, հայերենին ավելի լավ տիրապետելու համար: Ապրիլի 24-ին նրանք գտնվել են Թեհրանի կենտրոնում գտնվող «Արարատ» մարզամշակութային կենտրոնում, որտեղ հավաքվել են 20 հազար թեհրանահայեր` ոգեկոչելու անմեղ հայ զոհերի հիշատակը: Որդիներս ցնցված էին, երբ իմացան այդ հավաքի բուն նպատակը: Փոքրս լացակումած ասաց. «Եթե աղոթող 20 հազար հայերի ձայնն էր այդքան ուժգին, որը լսելի էր գրեթե ամբողջ քաղաքով, ապա պատկերացնում եմ մեկ ու կես միլիոն սպանվող հայերի ձայնը որքան սահմռկեցուցիչ է եղել: Ինչպե՞ս են թուրք հասարակ քաղաքացիները թույլ տվել նման հանցանք»,- հարցրեց որդիս»,- գրում է Բազիլը` եւս մեկ անգամ կոչ անելով թուրք հասարակության բարի մարդկանց` կանգնել, բարձրաձայնել ու պահանջել արդարության վերականգնում` մեկ ու կես միլիոն սպանված անմեղ հայերի համար:

http://armenpress.am/arm/news/687843/britanaci-hraparakakhosy-mek-u-kes-milion-turqeri-koch.html