Մուշում բնակություն հաստատած Դյոնմեզ ընտանիքը որոնում է իր այն ազգականներին, որոնց կորցրել է 1915 թ.: Աղրըում (Արարատ) ապրած այս ընտանիքի անդամները միմյանց կորցրել են 1915 թ. ռուս-օսմանյան պատերազմում, նրանք ջանքեր են գործադրում իրար գտնելու ուղղությամբ, բայց` ապարդյուն:
«Ջիհան» լրատվական գործակալության հաղորդմամբ` ներկայում Մուշում բնակվող Դյոնմեզ ընտանիքն իր հարևաններից տեղեկացել է, որ իր ազգականները 1990-ական թվականներին Հայաստանի Հանրային ռադիոյով հայտարարություն են հաղորդել իրենց գտնելու նպատակով, և հայտնել, թե իր միակ երազանքը հարազատներին գտնելն է: Մեհմեթ Դյոնմեզը հետևյալ կերպ է ներկայացրել իր ազգականներին կորցնելու պատմությունը. «Պապիս անունը Բեքիր է, իսկ տատինս` Ալմաստ: Պարզվում է` պապս երկու եղբայր է ունեցել: Նա մեզ պատմում էր, որ ռուս-օսմանյան պատերազմից առաջ իրենք ապրել են Աղրը նահանգում: Պապիս եղբայրները` Ահմեթն ու Մեհմեթը, պապիս` Բեքիրի և տատիս` Ալմաստի վրա բարկանալով` հեռացել են Ռուսաստան, իսկ մենք Աղրըից գնացել ենք Կարս, այնտեղից էլ` Մուշ: 1990-ական թվականներին Երևանի ռադիոն (Հայաստանի Հանրային ռադիոն-Ակունքի խմբ.) հաղորդել է մեր կորցրած ընտանիքի զավակների հայտարարությունը: «Որոնում ենք մեր կորած ազգականներին» ասելով` ռադիոյով հաղորդել են պապիս` Բեքիրի և տատիս` Ալմաստի անունները: Մենք այդ պահին դրսում էինք. չենք լսել: Մեր հարևանները եկան և ասացին մեզ այդ մասին: Մեր ազգականներին գտնելու համար մինչև Հայաստան հասանք, բայց չկարողացանք գտնել»:
Դյոնմեզը շեշտեց, թե իրենց միակ երազանքը կորած ազգականներին գտնելն ու հարյուրամյա կարոտը թոթափելն է:
Akunq.net
Leave a Reply