Վաշինգտոնում բացվել է «Հայոց Ցեղասպանության վկաները» վերտառությամբ բացառիկ լուսանկարչական ցուցահանդես

ԱՄՆ-ի Հայոց ցեղասպանության թանգարանը տեղեկացնում է սույն թվականի ապրիլի 5-ից Վաշինգտոնի Քեփիթոլ Հոլում բացված Հայոց ցեղասպանությունը վերապրածների բացառիկ լուսանկարչական ցուցահանդեսի մասին: Թանգարանի տարածած հաղորդագրության համաձայն` այն նախաձեռնվել և իրականացվել է Ամերիկայի Հայկական Համագումարի և Հայկական ազգային ինստիտուտի կողմից: Լուսանկարներն արվել են Ցեղասպանության տարիներին Օսմանյան կայսրությունում գտնվող գերմանացիների կողմից:

Նշվում է, թե Հայոց ցեղասպանության վերաբերյալ լուսանկարչական վկայություները հազվադեպ են: Չնայած այն հանգամանքին, որ Առաջին աշխարհամարտի տարիներին Գերմանիան և Օսմանյան պետությունը ռազմական դաշնակիցներ են եղել, և Օսմանյան կայսրության ներկայացուցիչների կողմից արգելք է եղել տեսախցիկներով հայկական արտաքսումների և ջարդերի ֆիքսումը, Օսմանյան կայսրությունում ծառայություն անցնող գերմանացի զինվորականներն, այնուհանդերձ, գաղտնի արձանագրել են հայկական ջարդերի տեսարաններ:

Ցուցահանդեսը եվրոպական տարբեր երկրների արխիվներում երկարամյա աշխատանքի արգասիքն է եղել: Ներկայացված լուսանկարների մեծ մասը տասնյակ տարիների մոռացությունից հետո առաջին անգամ են ներկայացվում լայն հանրությանը:

Հայերի նկատմամբ թուրքական բռնությունները, գաղթի ճանապարհներին հալածանքները ֆիքսած լուսանկարներն ուղեկցվում են օրագրային գրառումներով և լուսանկարիչների մեմուարներով, որոնք ևս մեկ անգամ հավաստում են լուսանկարչական վկայությունների իսկության մասին:

http://www.panorama.am/am/society/2012/04/11/exhibition/