Թուրքիայի քաղաքացի, ազգությամբ հայ երիտասարդի ֆիլմը կցուցադրվի Կաննի փառատոնում

Անադոլու համալսարանի Հեռահաղորդակցության ֆակուլտետի Կինեմատոգրաֆիայի և հեռուստատեսության բաժնի 4-րդ կուրսի ուսանող, հայազգի Ուղուր Էգեմեն Իրեսը ձեռք է բերել Կաննի 65-րդ ֆիլմերի փառատոնի կարճամետրաժ ֆիլմերի ցուցադրությանը մասնակցելու իրավունք: Անադոլու համալսարանի կայքէջում հրապարակված տեղեկության համաձայն` Թուրքիայի Հանրապետության Մշակույթի և զբոսաշրջության նախարարության Հեղինակային իրավունքի գլխավոր վարչության կողմից «Ապագայի ֆիլմի նախագծի» շրջանակներում աջակցություն ստացած սույն ֆիլմը նվիրված է զինված հարձակման զոհը դարձած «Ակօս» շաբաթաթերթի գլխավոր խմբագիր Հրանտ Դինքի ներկայացրած մի պատմությանը:

Ֆիլմի սցենարի հեղինակ և բեմադրիչ Ուղուր Էգեմեն Իրեսը, ով, ի դեպ, ազգությամբ հայ է, հայտնելով, թե ինքը շատ է ազդվել, երբ ընթերցել է 2007 թ. սպանված Դինքի` ամեն տարի Ֆրանսիայից Թուրքիա գնացած և Սըվասի գյուղերից մեկում վախճանված Թուրքիայի Հանրապետության քաղաքացի հայազգի մի կնոջ պատմությանը նվիրված «Ջուրը գտավ իր հունը» վերնագրով պատմվածքը, նաև հայտնեց, որ այս պատմությունը շատ հումանիստական կառուցվածք ունի:

Իրեսը նաև ասաց. «Ինձ հուզեց հատկապես այն, որ գյուղի բնակչությունը տեր կանգնեց այդ կնոջը: Ես այդ պատմությունը շատ հավաստի համարեցի: Ցանկացա այն 2010 թ. կարճամետրաժ ֆիլմի սցենար դարձնել: Հանդիպեցի «Ակօս» շաբաթաթերթի աշխատակիցների և Հրանտ Դինքի դստեր հետ: Նրանք չուզեցին, որ այս պատմությունն աղճատվի: Բեմադրիչ Շյուքրյու Օզչելիքի հետ սույն նախագծի շուրջ երկար-բարակ զրուցելուց հետո գրեցինք մեր սցենարը: Անցյալ ամառ էլ ավարտին հասցրեցինք ֆիլմի նկարահանումները: Մեր ֆակուլտետի դեկան, դոկտոր, պրոֆ. Նեզիհ Օրհոնը ֆիլմի նկարահանման ողջ ընթացքում մեզ աջակցություն ցուցաբերեց սննդի հարցում: Դոկտոր, պրոֆ. Սեզեն Ունլյուն էլ մեզ լոգիստիկ օգնություն ցուցաբերեց: Մի ընկերություն մեզ որոշ սարքավորումներ տրամադրեց: Ձգտեցինք համատեղ ուժերով նկարահանել այդ ֆիլմը: 15 հոգի էինք: Ֆիլմում 3 գլխավոր հերոսներ ունենք: Ֆիլմում ներգրավվել է նաև գյուղի բնակչությունը: Մեր ֆիլմը, որի նկարահանման ընթացքում ֆինանսական որոշ դժվարություններ ունեցանք, 4 հազար լիրա արժեցավ»:

Իրեսն ընդգծելով, թե ֆիլմը նկարահանելիս իրենք այն Կաննի ֆիլմերի փառատոնին ներկայացնելու նպատակ չեն ունեցել, հավալեց. «Մեր ֆիլմը մարդկայնության և հումանիզմի մասին է: Ես իմ ստեղծած ֆիլմերով փորձում եմ մարդկանց նեղությունները և հասարակական խնդիրները ներկայացնել անհատական պատմությունների միջոցով: Ֆիլմում ձգտել ենք դառնալ այն մարդկանց խոսափողը, ովքեր Հրանտ Դինքի սպանությունից հետո ամեն տարի երթ են կազմակերպում: Մեր նկարահանած այս կարճամետրաժ ֆիլմը մեր դասախոսների խրախուսմամբ որոշեցինք ներկայացնել որևէ միջազգային կինոփառատոնի: Երբ հետաքրքրվեցինք, տեղեկացանք, որ մոտ ժամանակներում նախատեսվող առաջին կինոփառատոնը Կաննի փառատոնն է: Անցյալ ամիս ֆիլմն ուղարկեցինք Կաննի կինոփառատոնին: Մեր ֆիլմը մարտի 31-ին շահեց կարճամետրաժ ֆիլմերի բաժնում ցուցադրվելու իրավունք: Ֆիլմն ընդունվեց որոշ փուլերով անցնելուց և չափանիշներին համապատասխան համարվելուց հետո: Այս փուլից հետո ֆիլմի ցուցադրություններն ենք կազմակերպելու մեր երկրի տարբեր փառատոներում: Ֆիլմը կցուցադրվի նաև Էսքիշեհիրի միջազգային կինոփառատոնում»:

Իրեսը նաև հայտնեց, որ ֆիլմը մայիսի 16-27-ը կցուցադրվի Կաննում, և որ իրենք ծրագրում են այնտեղ գնալ դոկտոր, պրոֆ. Նեզիհ Օրհոնի հետ:

Akunq.net