Թուրքիայի տնտեսական վերելքի հույսը Արեւմտյան Հայաստանի պեմզայի պաշարներն են

Թուրքիայի` օրեցօր վատացող տնտեսության վերելքի համար միակ հույսը թուրք տնտեսագետները կապում են Արեւմտյան Հայաստանի տարածքում եղած պեմզայի պաշարների հետ:

Ինչպես հաղորդում է «Արմենպրես»–ը` վկայակոչելով CNNTurk-ը, Սպարտայի Սուլեյման Դեմիրելի անվան համալսարանի պրոֆեսոր Լյուֆթուլլահ Գյունդուզը հայտարարել է, որ «լավ գնահատելու դեպքում պեմզան կփակի Թուրքիայի տնտեսության ընթացիկ ճեղքվածքը»: Թուրք պրոֆեսորի կարծիքով` աշխարհում պեմզայի պաշարների 45 տոկոսը կուտակված է Հայկական բարձրավանդակում:

«Թուրքիայի տնտեսության բացը ներկրման եւ արտահանման միջեւ հսկայական ճեղքվածքն է հանդիսանում: Միայն պեմզայի արտահանումը միանգամայն կփակի այդ ընթացիկ ճեղքվածքը: 2011-ին պեմզայի արտահանման ծավալը կազմել է 500 մլն դոլար: Արդյունահանման պայմանները լավացվելու դեպքում պեմզայի արտահանման ծավալները կարելի է հասցնել տարեկան 20-25 մլրդ դոլարի», -ասել է նա:

Թուրք պրոֆեսորը նշել է, որ պեմզայի ամենաշատ պաշարները գտնվում են Բիթլիսի, Վանի, Աղրըի (Արարատ), Կարսի եւ միջին Անատոլիայի շրջաններում:

Պեմզան որպես հումք օգտագործվում է արդյունաբերության 250 ճյուղերում: Այն կիրառվում է ատամի մածուկից սկսած մինչեւ շինարարության, իսկ վերջերս էլ` նանոտեխոնոլոգիայի բանգավառներում:

http://armenpress.am/arm/news/687437/turqiayi-tntesakan-verelqi-huysy-arevmtyan-hayastani.html