Քրիստոնյա հոգևորականի դեմ հարձակում Սուրբ Զատիկի տոնին

Ինչպես տեղեկացնում է թուրքական «Միլիեթ» օրաթերթը, քրիստոնյա աշխարհի համար ամենակարևոր սուրբ տոնի ժամանակ Ստամբուլի Բահչելիեվլեր թաղամասի  պրեսբիթերյան եկեղեցու հոգևոր հովիվ Սեմիր Սերքեքը ենթարկվել է հարձակման: Տուն-եկեղեցին կառուցել են 2001 թ. ապրիլին մի խումբ հավատացյալներ: 

Սերքեքը հայտնել է, թե նախորդ օրը` երեկոյան ժամը 21:00 մոտ, 4 երիտասարդներ, որոնց անձը չի բացահայտվել, փորձել են ուժ գործադրելով` եկեղեցի մտնել և ստիպողաբար պահանջել, որ հոգևորականը արտասանի շահադան (շահադան իսլամի հինգ սկզբունքներից մեկն է, որը պետք է անկեղծորեն արտասանել` ընդունելով, թե «չկա Աստված` բացի Ալլահից, եւ Մուհամեդը նրա մարգարեն է»-Ակունքի խմբ.). «Մուսուլմանական թաղամասում եկեղեցին ի՞նչ գործ ունի, մենք ընդունում ենք ձեր կրոնը, դուք ինչու՞ չեք ընդունում մերը, եթե չարտասանես շահադան, հողի տակ կփտես»:

Հոգևորականը փորձել է խնդիրը հարթել, սակայն երիտասարդները ընդդիմացել են:  Երբ հոգևորականը հարցրել է, թե ով է իրենց ուղարկել, և հրաժարվել է շահադան արտասանել, երիտասադներից մեկը ոտքով հարվածել է հոգևորականին, և նրանք փախել են: Հոգևորականն անմիջապես դիմել է ոստիկանություն: Դեպքի կապակցությամբ հետաքննություն սկսած ոստիկանությունը հետաքննության շրջանակներում վերցրել է շրջակա տեսախցիկների ձայնագրությունները` դեպքի մանրամասները պարզելու նպատակով:

09.04.2012

Akunq.net