Թուրքական դատախազությունը Թուրքիայում արգելված Քրդստանի աշխատավորական կուսակցության (PKK) քաղաքային թեւ համարվող Քրդստանի համայնքների միության (KCK) հետ իբրեւ թե համագործակցելու համար մեղադրյալների նկատմամբ, որոնց մեջ է նաեւ Հայոց ցեղասպանությունը ճանաչած, Ստամբուլի «Բելգե» հրատարակչության սեփականատեր Ռագըփ Զարաքոլուն, 119 տարվա ազատազարկման պատիժ է պահանջել:
Ինչպես հաղորդում է «Արմենպրես»–ը` վկայակոչելով «Անատոլու» լրատվական գործակալությունը, Թուրքիան հայտարարում է, որ KCK-ը ձգտում է ահաբեկչության միջոցով քաոս ստեղծել եւ ստիպել կառավարությանը ինքնավար Քրդստան ստեղծելու վերաբերյալ բանակցությունների գնալ KCK-ի հետ: Թուրքիայի խորհրդարանում 35 պատգամավորներ ունեցող միակ քրդական Խաղաղություն եւ ժողովրդավարություն կուսակցության (ԽԺԿ) պատգամավորները վարչապետ Ռեջեբ Թայիբ Էրդողանին մեղադրել են քրդերի հիմնական իրավունքների խախտման եւ PKK-ի ապստամբների 30-ամյա պայքարն ավարտելու շուրջ իրենց ջանքերը ճնշելու մեջ, որն արդեն 40 հազար մարդկանց կյանք է խլել:
KCK գործով բազմաթիվ մեղադրյալների մեջ են նաեւ Ստամբուլի Մարմարա համալսարանի քաղաքագիտության պրոֆեսոր եւ ԽԺԿ անդամ Բուշրա Էրսանլին, եւ թուրք գրող, լրագրող , հասարակական գործիչ Զարաքոլուն, ով վերջին 4 տասնամյակներում պարբերաբար քաղբանտարկյալ է եղել Թուրքիայում:
Դատախազները Էրսանլիի համար 38,5 տարվա, իսկ Զարաքոլուի համար` 15 տարվա ազատազրկում են պահանջում: Ընդհանուր առմամբ` KCK-ի գործով 189 մեղադրյալներ կարող են 7,5-ից մինչեւ 111 տարվա ազատազրկման պատիժ ստանալ, իսկ նրանցից մեկն էլ` 119 տարվա ազատազրկում:
Հայոց ցեղասպանությունը ճանաչած Ռագըփ Զարաքոլուն իր հրատարակչությունում բազմաթիվ գրքեր է հրապարակել ցեղասպանության մասին, ինչի համար հետապնդումների է ենթարկվում Թուրքիայում:
http://armenpress.am/arm/news/687168/turq-datakhazy-hayoc-cexaspanutyuny-tchanachats-zaraqolui.html
Leave a Reply