Թուրքիայի վարչապետ, իշխող «Արդարություն եւ զարգացում» կուսակցության (ԱԶԿ) առաջնորդ Ռեջեփ Թայիփ Էրդողանը 1993 թ-ի հուլիսի 2-ին Սվազում իշխանությունների թողտվությամբ իրագործված սպանդի համար մեղադրել է Աթաթուրքի հիմնադրած, այն ժամանակ իշխող Ժողովրդահանրապետական կուսակցությանը (ԺՀԿ):
Ինչպես հաղորդում է «Արմենպրես»–ը` վկայակոչելով թուրքական «Իլհաս» լրատվական գործակալութույնը, ԱԶԿ նահանգային բաժանմունքների ղեկավարների հետ հանդիպման ժամանակ Էրդողանն ասել է. «Իսկ ով՞ էր իշխանության գլուխ Սվազի կոտորածի ժամանակ: Այժմյան ԺՀԿ-ն` այն ժամանակ ՍԴԿ-ի անվան տակ: Նշանակում է` ԺՀԿ-ն հանցակից է Սվազի կոտորածների մեջ», -ասել է Էրդողանը:
Սոցիալ-դեմոկրատական կուսակցությունը (ՍԴԿ) 1995 թ-ին միավորվել է ԺՀԿ-ի հետ:
1993 թ-ի հուլիսի 2-ին Սվազի Մեդիմաքս հյուրանոցում 200 թուրքաբնակ ալավի (շիա) մտավորականներ համաժողով են անցկացրել, որին մասնակցել է նաեւ թուրք հայտնի գրող Ազիզ Նեսինը: Իսլամիստները բողոքի երթ են կազմակերպել եւ հարձակվել ու հրդեհել են հյուրանոցը: Հրդեհի հետեւանքով պաշտոնական տվյալներով` 37, ոչ պաշտոնական տվյալներով` 100-ից ավելի մարդ է մահացել, մոտ 90 մարդ էլ վիրավորվել է: Հարձակման ենթարկված մտավորականների հեռախոսազանգերին իշխանությհունները չեն արձագանքել: Իշխանությունների կողմից կազմակերպված այդ կոտորածի ժամանակ վիրավորվել է նաեւ Ազիզ Նեսինը:
2012 թ-ի մարտի 13-ին Անկարայի 11-րդ ծանր հանցագործությունների դատարանը Սվազի դատական գործը ժամկետի վաղեմության հիմնավորմամբ կարճել է եւ դատարանի դահլիճից ազատ արձակել բոլոր կասկածյալներին: Էրդողանը գոհունակություն է հայտնել դատարանի ընդունած որոշման կապակցությամբ եւ հայտարարել, թե «վերջապես կազատվի դրանից»:
Leave a Reply