Դերսիմի տեղահանության հետքերը փնտրելու են ԱՄՆ-ում

Թուրքիայի վարչապետ Ռեջեփ Թայիփ Էրդողանի Դերսիմի վերաբերյալ ելույթը և դրան հետևած 1938 թ. տեղի ունեցած դեպքերի վրա լույս սփռող փաստաթղթերի հրապարակումը թեև Ժողովրդահանրապետական կուսակցության դեմ ուղղված ժեստ էր, այնուամենայնիվ, Դերսիմի կոտորածների մասին ազատ խոսելու հող նախապատրաստեց: Այսօր արդեն դերսիմցիները, հատկապես կոտորածների ականատեսները, փորձում են ազատվել իրենց պարուրած վախի մթնոլորտից, խոսել կատարվածի մասին, պահանջել իրենց իրավունքները: Այսպես, օրինակ, Թուրքիայի Ազգային մեծ ժողովի (ԹԱՄԺ) Դիմումներ ընդունող հանձնաժողովում Դերսիմի վերաբերյալ 500-ից ավելի դիմում կա:

Ինչպես տեղեկացնում է թուրքական «Սթար» թերթը, այս անգամ ԹԱՄԺ-ին դիմում է ներկայացրել Դերսիմի դեպքերի ժամանակ ողջ ընտանիքին կորցրած 85-ամյա Հալազուր Գևիշը: Նրա դիմումի վերաբերյալ ԹԱՄԺ-ը Արտաքին գործերի նախարարության միջոցով «Դերսիմի» առնչությամբ դիմելու է ԱՄՆ-ին:

Բացի այդ` ԹԱՄԺ-ը իրենց բռնագրավված հողակտորի վրա զորանոց կառուցելու Գևիշի պնդումները քննելու նպատակով Ազգային անշարժ գույքի վարչությանը գրություն է ուղարկել` պահանջելով  փաստաթղթեր` պարզելու, թե մինչև 1942 թ. զորանոցի տարածքն ում է պատկանել: Հալազուր Գևիշը պնդում է` 100 դյոնում հողակտորը, որը գնել են իր հոր` Ամերիկայից բերած փողերով, Դերսիմի դեպքերի վերջում իրենցից բռնագրավել են: Նա երեկ ԹԱՄԺ-ի Դիմումներ ընդունող հանձնաժողովին դիմել է երրորդ անգամ` պահանջելով ուսումնասիրել իր պնդումները:

Հալազուր Գևիշը իր դիմումում հայտնել է նաև, որ իր հայրը` Քերեմ Օղլու Հյուսեին Մուստաֆան, ենթադրաբար 1907-1908 թթ. գնացել է ամերիկա, որտեղ աշխատել է 19 տարի: ԹԱՄԺ-ի Դիմումներ ընդունող հանձնաժողովը Արտգործնախարարության միջոցով ԱՄՆ-ին հարցում է կատարելու` պարզելու, թե Հյուսեին Մուստաֆան ԱՄՆ մուտք գործե՞լ է, թե ոչ: Ինչպես նաև պահանջելու է 1907-1908 թթ. Խարբերդից Ամերիկա գնացածների ցուցակը:      

02.04.2012

Akunq.net