Բիրանդը Դինքին թուրքական պետության նահատակն է համարում

CNNTurk-ի քաղաքական վերլուծաբան Մեհմեդ Ալի Բիրանդն անդրադարձել է Թուրքիայում նահատակ հայտարարելու մասին խոսակցություններին:

«Հրանտ Դինքը թուրքական պետության նահատակն է: Ռազմի դաշտում պետության համար զոհվածներից Թուրքիան ավելի շատ է պարտական Հրանտին, որովհետեւ նա գիտակցաբար է Հրանտին մահվան ուղարկել, եւ անհրաժեշտ պահանջկոտություն չցուցաբերել` նրա հայ լինելու համար: Մի տեսանկյունից, նրա մահվան համար իրական պատասխանատուն պետությունն է. ոչ պաշտպանել է նրան, ոչ էլ դավադրության մասին իմանալով հանդերձ` գործողության դիմել: Ոչ ոք թող չնեղանա, բայց «նահատակության» կապակցությամբ քննարկումներից հայերի նկատմամբ թշնամության հոտ է գալիս: Ընտրողներին բավարարելու նպատակով կատարվող այդ քննարկումները միայն նոր ցավեր են բացում», -գրում է Բիրանդը:

Ինչպես հաղորդում է «Արմենպրես»–ը, Բիրանդը Հրանտ Դինքին Թուրքիայում նահատակ հայտարարելու մասին խոսակցություններին անդրադարձել է Ազգայնական կուսակցության առաջնորդ Դեւլեթ Բահչելիի արած այն հայտարարության կապակցությամբ, թե Թուրքիայում նահատակ կարող է հայտարարվել միայն մահմեդականը:

«Դինքի ընտանիքը նահատակին տրվող նպաստի կարիքը չունի: Նրա եւ մեր բոլորի հիմնական սպասելիքն այն է, որ ամենից առաջ, պետությունը հայտնաբերի եւ ըստ արժանվույն պատժի հանցագործության իրական պատասխանատուներին», -գրում է Բիրանդը:

Հրանտ Դինքին նահատակ համարելու հնարավորության մասին առաջինը հայտարարել է Թուրքիայի ընտանիքի եւ սոցիալական ծառայությունների նախարարը: Նա ասել է, որ քաղաքացիական նահատակների մասին օրենքի համաձայն` եթե Դինքի ընտանիքը դիմի, ապա որպես նահատակի ընտանիք, կարող է օգտվել օրենքով սահմանված բոլոր արտոնություններից:

Ստամբուլի «Ակօս» թերթի գլխավոր խմբագիր Հրանտ Դինքը թուրքական ազգայնական շրջանակների կողմից դավադրաբար սպանվել է 2007 թ. հունվարի 19-ին: 

http://armenpress.am/arm/news/686486/birandy-dinqin-turqakan-petutyan-nahatakn-e-hamarum.html