Էրդողանը խորհրդարանին խնդրել է մեկ տարով երկարաձգել երկրի զինված ուժերի ներկայությունն Ադրբեջանում

Թուրքիայի նախագահ Ռեջեփ Թայիփ Էրդողանը հայց է ուղարկել խորհրդարան՝ Ադրբեջանում թուրքական զինված ուժերի առաքելությունը՝ ռուս-թուրքական համատեղ մոնիտորինգի կենտրոնի կազմում մեկ տարով երկարաձգելու վերաբերյալ։ TRT հեռուստաալիքի փոխանցմամբ՝ հանրապետության զինվորականներին ուղարկելու մանդատը, օրենսդիրների կողմից հաստատվելու դեպքում, այս տարվա նոյեմբերի 17-ից մեկ տարով կերկարաձգվի։

Էրդողանի ուղարկած փաստաթղթում ասվում է, որ «միասնական կենտրոնը, որտեղ ծառայում են Թուրքիայի զինված ուժերի ներկայացուցիչները, հաջողությամբ շարունակում է իր գործունեությունը, և Թուրքիան իր ներդրումն է ունենում տարածաշրջանի անվտանգության և կողմերի միջև վստահության ամրապնդման գործում»։

Ադրբեջանում թուրք զինվորականների ներկայությունը, ի թիվս այլ բաների, ամրագրված է «Թուրքիայի և Ադրբեջանի միջև 2010 թվականի օգոստոսի 16-ի Ռազմավարական գործընկերության և փոխօգնության մասին համաձայնագրի դրույթներից բխող պարտավորություններով» և անհրաժեշտ է «հրադադարի պահպանմանը հետևելու, խախտումները կանխելու և տարածաշրջանում խաղաղություն ու կայունություն ապահովելու համար»։

Լեռնային Ղարաբաղի հակամարտության գոտում հրադադարի և բոլոր ռազմական գործողությունների մոնիտորինգի ռուս-թուրքական համատեղ կենտրոնը տեղակայվել է 2021 թվականի հունվարի 30-ին Ադրբեջանի տարածքում՝Ռուսաստանի և Թուրքիայի պաշտպանական գերատեսչությունների ղեկավարների կողմից 2020 թվականի նոյեմբերի 11-ին ստորագրված հուշագրի համաձայն։

https://news.am/arm/news/792247.html