Նախապայմանների պարտադրանքի տակ չի կարելի երեւակայել հայ-թուրքակական հարաբերությունների բնականոնացում. Տեր-Խաչատուրյան

Թուրքիան առաջ է քաշում ոչ միայն նախկին նախապայմանները, այլեւ «միջանցքի» բացումն էլ է ավելացրել այդ ցանկում։ Այս մասին փետրվարի 5-ին, ՀՅԴ-ի 131-ամյակին նվիրված միջոցառմանը հայտարարեց ՀՅԴ Բյուրոյի ներկայացուցիչ Հակոբ Տեր-Խաչատուրյանը։

«Մենք ունեցել ենք տխուր փորձառություն 2008-2009թթ․-ականների ընթացքում, երբ հայ-թուրքական հարաբերությունների անվան տակ, փորձ արվեց կարգավորել այդ հարաբերությունները։ Այդ օրերին մենք հայտարարեցինք, այսօր էլ նույն կեցվածքն ունենք, որ մենք դեմ չենք հարաբերությունների հաստատմանը, մինչեւ այն պահը, երբ նրանք չեն լինի նախապայմաններով, մինչեւ այն պահը, որ մենք վայր չենք դնի հայ ժողովրդի անժամանցելի իրավունքները, մինչեւ այն պահը, որ չենք հանդուրժի որ թուրքական տնտեսությունը եւ ճնշումները ամբողջովին ողողեն Հայաստանը, եւ որ այդ հարաբերությունները չեն մշակվի պարտադրանքի տակ։ Այսօր սակայն մենք ականատեսն ենք, որ Թուրքիան ոչ միայն առաջ է քաշում նախկին նախապայմանները, այլեւ այսպես կոչված՝ «միջանցքի» բացումը ավելացրել է այդ ցանկում։ Մեզ համար հստակ է, որ պարտված մթնոլորտում եւ թուրքական ամեն տեսակի նախապայմանների պարտադրանքի տակ չի կարելի երեւակայել հարաբերությունների որեւէ բնականոնացում այս հանգրվանում»,- հայտարարեց ՀՅԴ Բյուրոյի ներկայացուցիչ Հակոբ Տեր-Խաչատուրյանը։

News.am