Լույս է տեսել Հայ Դերսիմ ամսագրի առաջին համարը

Բարև ձեզ սիրելի  «Հայ Դերսիմ» ամսագրի ընթերցողներ։ Մենք հարգանքով ողջունում ենք բոլորիդ՝ մեր ամսագրի առաջին համարը ձեզ ներկայացնելու ոգևորությամբ: «Հայ Դերսիմ»-ը իր կյանքը սկսեց հստակ դիրքորոշմամբ՝ ընդդեմ բոլոր տեսակի ցեղասպանության ու ջարդերի։ Այն այդպես էլ կշարունակվի։ Մեր տարածաշրջանի բազմաթիվ ժողովուրդների նկատմամբ դաժան ցեղասպանություններ են իրականացվել։ Երբ ասվում է ցեղասպանություն, չպետք է հիշել միայն մարդկանց դեմ իրականացված ջարդերը։ Ջարդերից հետո այդ ազգերի լեզվին, մշակույթին, հավատքին, ավանդույթներին ու սովորույթներին միջամտելը, դրանց ոչնչացման ուղղությամբ ձեռնարկված ամեն քայլը մաս են կազմում ցեղասպանությանը և դրա շարունակությունն են։

«Հայ Դերսիմ» մշակութային և արվեստին նվիրված ամսագիրը, որը Դերսիմ Հայ  հարթակի մաս է կազմում, պարտավորվել է ստանձնել մի կարևոր աշխատանք՝ կանխելու այս ցեղասպանությունների կրկնությունը և պաշտպանելու, գրանցելու և վերականգնելու անցյալից մինչ այժմ պահպանված ժառանգությունը։  Որպես դերսիմահայեր և դերսիմահայերի ընկերներ, մենք որոշեցինք համախմբվել «Դերսիմ Հայ» հարթակի շուրջ և դառնալ մեկ մարմին։ Մեր նպատակն է մշակութային գործունեության միջոցով նպաստել Դերսիմում էթնիկ հայկական ինքնության և մշակույթի կենսագործունեությանը և ինքնարտահայտմանը` ամրապնդելով կապերը աշխարհով մեկ սփռված Արևմտյան Հայաստանի հայերի և Դերսիմում ապրող էթնիկ հայերի և նրանց ընկերների հետ:

Մենք ցանկանում ենք, որ Եվրոպայում, Ամերիկայում, Ռուսաստանում և Ֆրանսիայում ապրող հայերը հյուրընկալվեն Դերսիմում՝ իրենց տան պես, ինչպես որ այցելում են Հայաստան և Արցախ։ Մենք ակնկալում ենք, որ մեր բոլոր ընկերները, ովքեր ունեն տեղեկություն և փաստաթղթեր, կկիսվեն մեզ հետ իրենց գիտելիքներով և կաջակցեն մեզ այս գործում։

Նրանք, ովքեր ստիպված են եղել լքել այս հողերը, ստիպված են եղել հեռանալ, մեր պապերի հարևաններն են եղել։ Մեր բարիդրացիական պարտքն է պաշտպանել նրանց հիշողությունները, հիշատակները և նրանց թողածը։ Քանզի նրանց թոռներն ապրում են աշխարհի տարբեր ծայրերում որպես անհայրենիք։

Մեր ընկերները, որոնց թիվը տասնմեկ միլիոնից ավելի է՝ Դերսիմից, Վանից, Տիգրանակերտից, Մուշից, Մարաշից, Կարինից և այլն, գիտեն իրենց պապերի գյուղերի անունները, սակայն երբեք չեն տեսել այս վայրերը: Նրանք քաղաքացիներն են այն երկրների, որտեղ ապրում են։ Նրանք գիտեն, որ այստեղ հայրենիք ունեն, բայց ապրելու օրինական իրավունք չունեն։ Մենք կարող ենք այդ մարդկանց այստեղ հրավիրել, եթե ճիշտ ուղղությամբ աշխատենք։ Մենք կարող ենք նրանց հնարավորություն տալ ոտք դնելու այս հողերը, որտեղ ապրել են իրենց նախնիները: Մենք գիտենք, որ ժողովուրդների միջեւ խնդիր չկա։ Այս հավատով մենք իրականացրած կլինենք մեր պատասխանատվությունը ժողովուրդների եղբայրության հանդեպ։

http://www.western-armenia.eu/news/Actualite/2021/Ermeni_Halkinin_Dogusu.pdf

https://westernarmeniatv.com/hy/113809/%d5%ac%d5%b8%d6%82%d5%b5%d5%bd-%d5%a7-%d5%bf%d5%a5%d5%bd%d5%a5%d5%ac-%d5%b0%d5%a1%d5%b5-%d5%a4%d5%a5%d6%80%d5%bd%d5%ab%d5%b4-%d5%a1%d5%b4%d5%bd%d5%a1%d5%a3%d6%80%d5%ab-%d5%a1%d5%bc%d5%a1%d5%bb%d5%ab