Մուշում դեռեւս կանգուն մնացած պատմական հայկական տների քանդման դեմ համատեղ հայտարարությամբ են հանդես եկել Մուշից ընտրված պատագամավորներ Դեմիր Չելիքը եւ Սըրրը Սաքըքը՝ հայտարարելով, թե Ցեղասպանության ենթարկված հայ ժողովրդից մնացած պատմական տները քաղաքային զարգացման նախագծի անվան տակ չեն կարող պատմությունից ջնջել։
Թուրքական Haberx-ի փոխանցմամբ՝ քրդական Խաղաղություն եւ ժողովրդավարություն կուսակցության` Մուշից ընտրված պատգամավորներ Դեմիր Չելիքը եւ Սըրրը Սաքըքն համատեղ հայտարարության մեջ նշել են, որ պատմության ամենացավալի հիշողություններ ունեցող Մուշի Քալե (բերդ) թաղամասի քանդումը թե հայ հասարակությանը, թե հայ հասարակության ցավերը կիսող մարդկանց մոտ խոր տխրություն է առաջացրել։
«Ոչ մի զգայուն քաղաքացի նման նախագծի հավանություն չի կարող տալ։ Թեեւ արդեն 100 տարի է անցել, տեղի ունեցած ողբերգության պատճառով արյունահոսում են մեր սրտերը։ Ցեղասպանության ենթարկված հայ ժողովրդից մնացած պատմական տները քաղաքային զարգացման նախագծի անվան տակ չեն կարող պատմությունից ջնջել։
Ցավալի պատմություններով լեցուն վայրերից մեկը հանդիսացող Մուշի Քալե թաղամասում իրականացվող նախագիծը պետք է խաղաղությանը նպաստի։ Քալե թաղամասի պատմական տները ոչ թե պետք է քանդել, այլ դրանք պետք է վերականգնել։ Քալե թաղամասում մշակութային փողոց կարելի է ստեղծել՝ վերանորոգելով հայկական եկեղեցիները եւ տները»,-նշվել է քուրդ պատգամավորների հայտարարության մեջ։
Նշենք, որ Մուշի քաղաքապետարանը որոշում է կայացրել Քալե թաղամասում կանգուն մնացած հայկական պատմական տները քանդել՝ տեղում շենքեր կառուցելու նպատակով։
Այս ամենը բողոքի ալիք է բարձրացրել Ստամբուլի հայ համայնքի եւ թուրք առաջադեմ գործիչների մոտ։
Հայկական տների քանդման դեմ ստորագրահավաքին է միացել նաեւ Ռագըփ Զարաքոլուն՝ նշելով. «Այս երկրում 1915-ի հաշիվը չպահանջելու պատճառով այսօր բոլոր բնիկ ազգերի (հայեր, հույներ, ասորիներ, քրդեր) նկատմամբ շարունակվում է համակարգված կոտորածը։ 1915-ին սկսված ցեղասպանությունն այսօր շարունակվում է որպես մշակութային եւ տնտեսական ցեղասպանություն։ Ժողովուրդների եղբայրության եւ հավասարության անունից քանդման դեմ մեկ ստորագրություն էլ դու դիր http://imzakampanyam.com»:
Leave a Reply