Թուրքիայում հարձակվել են գնչուների տների վրա

Թուրքիայի Բուրսա նահանգում մի քանի հարյուր մարդ հարձակվել է գնչուներին պատկանող տների վրա։

CNNTurk-ի փոխանցմամբ՝ Գյումուշթեփե բնակավայրում գնչու տղամարդը հարևանի հետ վիճաբանության ժամանակ ատրճանակից արձակած կրակոցով վիրավորել է 16-ամյա աղջկա։

Այս միջադեպից հետո շուրջ 500 հոգի է դուրս եկել փողոց և շարժվել դեպի այն թաղամասեր, որտեղ գնչուների տներն են։ Թուրքերի խումբը սկսել է քարեր նետել գնչուների տների վրա, վառել ավտոմեքենաներ և ձիերի սայլակներ, ինչպես նաև վիրավորական խոսքեր հնչեցրել գնչուների հասցեին։

Դեպքի վայր են ժամանել մեծաքանակ ոստիկանական ուժեր։ Ինքնադատաստանի 20 մասնակից ձերբակալվել է։ Դեպքի առնչությամբ հետաքննություն է սկսվել։

allTurkey.am