Թուրքիայի կրթության նախարարը հայտարարել է, թե «թյուրքախոս պետությունները հաջողությամբ են իրացնում միացյալ թյուրքական լեզու ստեղծելու ծրագիրը»։
Թուրքիայի կրթության նախարար Նաբի Ավջըն մասնակցել է Էսքիշեհիրում կայացած «Ադրբեջան Բաքու» միջոցառմանը, որի ժամանակ էլ խոսել թյուրքական լեզուների մասին, տեղեկացնում է թուրքական «Իհլաս» գործակալությունը։
«Մենք սկսել ենք մի նախագիծ, որով պետք է փորձենք թուրքերենը, Ստամբուլի թուրքերենը հասկանալի, ընթեռնելի և ընկալելի դարձնել բոլոր թյուրքախոս ժողովուրդների համար։ Բացի այդ, ՅՈւՆԵՍԿՕ-ի գլխավորությամբ նույնպես թյուրքական միացյալ լեզվի ուղղությամբ նախագծեր են իրականացվում»,-նշել է Թուրքիայի կրթության նախարարը։
Ավջըն նաև հավելել է, որ իրենք իրականացնում են թյուրքախոս երկրների երեխաների համար պատմության և աշխարհագրության միացյալ ուսուցանման ծրագրեր։
Նշենք նաև, որ Էսքիշեհիրն ընտրվել է թյուրքախոս երկրների 2013 թվականի մշակութային մայրաքաղաք։
allTurkey.am
Leave a Reply