Քրդական շարժման նոր պահանջները

* «PKK-ը չպէտք է ահաբեկչական կազմակերպութիւն համարւի»
* Ճշտորոշւի Քուրդստանի քաղաքական կարգավիճակը
* Օջալանի ազատ արձակում

«Ազատ օր» – Դիարբեքրից Ֆերիդ Ասլանի ստորագրութեամբ հաղորդւած մի լուր անսովոր մանրամասնութիւններ է տալիս Դիարբեքրում քրդերի նախաձեռնութեամբ կայացած մի երկօրեայ համագումարի մասին, ուր յաճախակի կերպով է խօսւում Քուրդստանի քաղաքական կարգավիճակը ճանաչելու եւ Աբդուլլահ Օջալանին ազատ արձակելու հրամայականների ու այլ խնդիրների մասին: Հետաքրքրական է, որ համագումարի վերտառութիւնն իսկ ունեցել է «Քուրդստան» անունը: Արդարեւ, համագումարը կոչւած է «Հիւսիսային Քուրդստան՝ միութեան եւ լուծման համագումար»:

Համագումարին ներկայ են գտնւել Մարդինի պատգամաւոր ու Դէ-Դէ-Քէ-ի նախագահ Ահմեդ Թիւրքը, իսկ երկօրեայ համագումարի աւարտին եզրափակիչ հաղորդագրութիւնը կարդացւել է Վանի անկախ պատգամաւոր եւ Դէ-Դէ-Քէ-ի փոխնախագահ Այսէլ Թուղլուքի կողմից: Թուղլուքը դիտել է տւել, որ վերջին հարիւր տարիներն անցան «միատարր իշխանութիւն» հասկացողութեան դէմ Քուրդստանի ապստամբութեամբ եւ ազատութեան պայքարով: Այս աւանդութեան գծով է, որ վերջին երեսուն տարիներից ի վեր պայքարը շարունակւում է, քուրդ ժողովրդի դիմադրութիւնը չի փշրւել՝ հակառակ Թուրքիայի Հանրապետութեան գործադրած բոլոր ոչնչացումներին ու ճնշումներին,- ասել է Թուղլուքը:
Նա նշել է, որ այս համագումարը մի նշանակալից քայլ է դէպի Քուրդստանի ու մերձակայ շրջանների ազատ ապագան:
Համագումարը մի հաղորդագրութիւն է տարածել, որտեղ պահանջում է հետեւեալները.
* Բոլոր քաղաքական բանտարկեալները պէտք է ազատ արձակւեն:
* Համագումարը կանգնած է Սիրիայի Ռոժաւա կոչւած քրդաբնակ շրջանի ժողովրդի կողքին:
* Համագումարը Իրաքի նախագահ Թալեբանիին, Իրաքեան Քուրդստանի Դաշնակցութեան նախագահ Բարզանիին եւ միւս կազմակերպութիւններին կոչ է ուղղում՝ ժամ առաջ Ազգային համագումար կազմակերպել:
* Համագումարը պահանջում է, որ PKK-ն այլեւս ահաբեկչական կազմակերպութիւն չհամարւի:
* Համագումարը պահանջում է, որ Աբդուլլահ Օջալանն ազատ արձակւի:

http://alikonline.ir/index.php/component/content/article/9-2011-10-08-08-46-06/15347-2013-07-18-05-56-27