Բաքվում եւ Նախիջեւանում կազմակերպված թուրք-ադրբեջանական համատեղ զորավարժությունները որեւէ կապ չունեն Հայաստանի գլխավոր դատախազ Աղվան Հովսեփյանի՝ Հայոց ցեղասպանության հետեւանքների վերացման իրավական գործընթաց սկսելու հայտարարության հետ։ Այս մասին հուլիսի 16-ին լրագրողների հետ հանդիպմանը հայտարարեց թուրքագետ Անդրանիկ Իսպիրյանը։
Իսպիրյանը, անդրադառնալով հուլիսի 12-ից 28-ը Բաքվում եւ Նախիջեւանում անցկացվող թուրք-ադրբեջանական համատեղ զորավարժություններին եւ դրանք Հայաստանի դատախազի հայտարարության հետ կապելուն, նշեց, թե թուրքական մամուլը դրանով քարոզչական հնարք է արել՝ գրելով, թե այդ զորավարժությունները պատասխան են Հայաստանի գլխավոր դատախազի ելույթին։
«Հայաստանի գլխավոր դատախազի ելույթը հուլիսի 5-ին էր, իսկ զորավարժությունները սկսվել են արդեն հուլիսի 12-ին։ Ծիծաղելի է կապել զորավարժությունները Աղվան Հովսեփյանի հայտարարության հետ, քանի որ զորավարժությունները մի քանի օրում չեն կազմակերպում, այլ ամիսներ կամ նույնիսկ մեկ տարի առաջ։ Թուրք-ադրբեջանական զորավարժությունները եւ Հայաստանի գլխավոր դատախազի ելույթները պարզապես համընկել են նույն ժամանակատվածում»,-նշեց թուրքագետը։
Նշենք, որ թուրքական եւ ադրբեջանական մամուլում հրապարակումներ են եղել «Թուրք-ադրբեջանական զորավարժություններն ընդդեմ Հայաստանի գլխավոր դատախազի հայտարարության» վերնագրերով, որտեղ փորձ են արել հավաստիացնել, թե զորավարժություններն իրոք պատասխան են Հայաստանի գլխավոր դատախազի հայտարարությանը։
Հիշեցնենք, որ Աղվան Հովսեփյանը հայտարարել էր հետեւյալը. «Իմ խորին համոզմամբ, ցեղասպանության զոհերի ժառանգները պետք է նյութական փոխհատուցում ստանան, Հայ եկեղեցուն պետք է վերադարձվեն Թուրքիայի տարածքում հրաշքով կանգուն մնացած եկեղեցիները եւ եկեղեցապատկան հողերը, Հայաստանի Հանրապետությունը պետք է ստանա իր կորցրած տարածքները եւ այլն: Բայց այդ բոլոր պահանջները պետք է ունենան անթերի իրավական հիմնավորումներ»,- ընդգծել է գլխավոր դատախազ Ա.Հովսեփյանը:
Լուսանկարը՝ Արսեն Սարգսյանի/NEWS.am
Leave a Reply