Առաջ է քաշվել այն տեսակետը, թե կաթոլիկ լոբբին չի ցանկանում, որ Թուրքիան ԵՄ անդամ դառնա

AB Haber լրատվական կայքում հրապարակված լուրի համաձայն` Հնդկաստանում տպագրվող “Dainik Tribune” պարբերականը, ընթերցողների ուշադրությունը հրավիրելով այն փաստի վրա, որ թեև Խորվաթիան չի համապատասխանել ԵՄ չափորոշիչներին, սակայն ԵՄ անդամ է դարձել, նաև գրում է. «ԵՄ-ի քաղաքականության վրա ազդեցություն գործող կաթոլիկ լոբբին բոլորովին չի ցանկանում, որ Թուրքիան ԵՄ անդամ դառնա»:

Ստորև ներկայացնում ենք հիշյալ թերթի հրապարակումը.

«Թուրքիան այս տարի էլ չկարողացավ Եվրոմիության մաս կազմել: Սակայն ԵՄ-ն կանաչ լույս վառեց Խորվաթիայի` Միությանն անդամակցությանը: Հուլիս ամսվա դրությամբ Խորվաթիան կդառնա ԵՄ-ի 28-րդ անդամը: Քաղաքական չարաշահումներով հայտնի Խորվաթիայում ո’չ օրենք է գործում, ո’չ էլ որևէ կանոն: Երկիրը պայքար է մղում կազմակերպված հանցավորությունների և անօրինականությունների դեմ: Խորվաթիայում բնակչության մեծ մասը կազմում են կաթոլիկ գնչուները և քրիստոնյա սերբերը:

Հնուց ի վեր ականատես ենք դարձել, որ քրիստոնեության` ճնշումների ենթարկվելու հետ մեկտեղ իսլամն ավելի է տարածվել: Դրա ամենավառ վկայությունը Ստամբուլում գտնվող և նախկինում եկեղեցի եղած Այա Սոֆիայի` մզկիթի վերածված լինելու փաստն է: Կոնստանդնուպոլսի ամենանշանավոր պատմական ժառանգություններից մեկը հանդիսացող Այս Սոֆիան Բյուզանդական և Օսմանյան կայսրությունները խորհրդանշող անհամար մշակութային արժեքների կրողն է: Այա Սոֆիան մինչև 1453 թ. մի կենտրոնական վայր էր, որտեղ քրիստոնյաներն իրենց պաշտամունքի ծեսերն էին կատարում: Թուրքիայի` տվյալ ժամանակվա առաջնորդ Մուստաֆա Քեմալի հրամանով` 1935 թ. Այա Սոֆիան վերածվեց թանգարանի:

1935 թ-ից մինչ օրս բազմաթիվ բաներ են փոխվել: Թուրքիայի պատմական անատոլիական (Արևմտյան Հայաստանում-Ակունքի խմբ.) քաղաքներից մեկում գտնվող Աղթամար (Սուրբ խաչ-Ակունքի խմբ.) եկեղեցին անցյալ շաբաթ մեկնարկած երկրորդ վերականգնողական աշխատանքներից հետո կբացվի ժողովրդի առաջ: Եկեղեցին Անատոլիայում ապրած որոշ քրիստոնյա սրբերի ծննդավայրն է:

Տեսարժան է նաև Արևմտյան Անատոլիայում գտվնող «Յեդի Քիլիսեն»: Կարիք չկա՞, որ Իզմիր քաղաքում գտնվող Եփեսոսում 4-րդ դարին պատկանող Մարիամ Աստվածածին եկեղեցին պահպանելու համար Եվրոմիությունը երախտապարտ լինի Թուրքիային: Թուրքիայի փոխվարչապետ Բեքիր Բոզդաղն ասել էր, թե «2012 թ. հոկտեմբերի դրությամբ Թուրքիայում առկա է գործող 349 եկեղեցի»: Ներկայում Թուրքիայում ապրում է 50 հազար քրիստոնյա: Արդյոք այս փաստը չի՞ ապացուցում ԵՄ-ին, որ Թուրքիան աշխարհիկ երկիր է»:

http://www.hristiyangazete.com/2013/07/katolik-lobisinin-turkiyenin-ab-uyesi-olmasini-istemedigi-one-suruldu/

Թարգմանեց Մելինե Անումյանը

Akunq.net