Հայերը շարունակելու են Դիարբեքիրում 173 հայապատկան գույքը վերադարձնելու ուղղությամբ աշխատանքները

Հայերին պատկանող 17 անշարժ գույք Դիարբեքիրի (Տիգրանակերտ, ներկայիս Թուրքիայի տարածք) Սուրբ Կիրակոս եկեղեցու հիմնադրամին է վերադարձվել, գրում է Sabah-ը և ներկայացնում այն խնդիրները, որոնց պատճառով հայերին չի վերադարձվում 173 այլ անշարժ գույք, որոնց պատկանելիության մասին փաստաթղթեր էին հայտնաբերվել Սուրբ Կիրակոս եկեղեցում։

173 անշարժ գույքը հետ ստանալու համար հիմնադրամը շարունակում է աշխատանքները, սակայն դա այնքան էլ հեշտ չէ։
«Եկեղեցու վերանորոգման ընթացքում հայտնաբերված փաստաթղթերում առկա վկայությունները հին են և անբավարար»,-հայտնել են Թուրքիայի հիմնադրամների գլխավոր վարչությունից և մերժել վերադարձնել դրանք։

Դիարբեքիրում 1915թ-ից հետո ավերված Սուրբ Կիրակոս հայկական եկեղեցին 2009թ. սկսված վերակառուցման արդյունքում վերաբացվել էր անցյալ տարի։ 400 տարվա պատմություն ունեցող եկեղեցում 1910-1921թթ.-ին լքված 190 անշարժ գույքի մասին հաստատող փաստաթուղթ է հայտնաբերվել։

Փաստաթղթերի հիման վրա հայերին պատկանող 17 անշարժ գույք է հաստատվել և վերադարձվել։ Մնացած 173-ի վերաբերյալ դեռ հաստատում չկա։

Սուրբ Կիրակոս եկեղեցու հիմնադրամի տնօրեն Վարդգես Էրգյուն Այըքը նշել է, որ իրենք ուրախ են 190-ից 17-ի վերադարձի առիթով։ «Սակայն դրանցից որոշներն այժմ գրավված են։ Դրանց տեղում ապօրինի շինություններ, անգամ՝ հանրային շինություններ են կառուցվել»,-ասել է նա։

Այըքը նշել է, որ այդ փաստաթղթերում առկա կառույցների ճշգրիտ տեղը որոշելը դժվար է։ «Հին փաստաթղթերում գրված է, օրինակ, «Գրիգորի տան կողքը», «Սարգսյանի հողամասի հետևում գտնվող Ահմեթի տան դիմացի տունը» կամ նման այլ բացատրություններ»,-ասել է հիմնադրամի ղեկավարն ու հավելել, որ Կադաստրի վարչություն են դիմել՝ օգնության խնդրանքով։

Ի դեպ, հայապատկան տարածքներում իրականացված կառուցապատումները հիմնականում ապօրինի են, և դրանց ներկայիս տերերը կեղծ փաստաթղթեր են ունեցել։

http://www.tert.am/am/news/2013/07/15/diarbekir-surp-giragos/