Թուրք ոստիկանները ցրել են հակակառավարական ցույցը

Թուրքիայի Հաթայ նահանգի Անթաքյա քաղաքում նոր բախումներ են տեղի ունեցել իրավապահների ու ցուցարարների միջև։ Ինչպես հայտնում է ИТАР-ТАСС-ը, մեծ թվով ցուցարարներ չարտոնված բողոքի ակցիա են կազմակերպել քաղաքի կենտրոնում, ինչից հետո հավաքվածները սկսել են քարեր նետել իրավապահների ուղղությամբ։

Ցուցարարները երթ են կազմակերպել, սակայն երբ ոստիկանները փակել են նրանց ճանապարհը, իրավիճակը սրվել է։ Ակցիայի մասնակիցները փորձել են ճեղքել ոստիկանների կազմած շղթան, ինչից էլ սկսվել են անկարգությունները։

Տեղական հեռուստաընկերությունն ու սոցկայքերը հայտնում են տասնյակ տուժածների մասին։ Բողոքի ակցիայի պատճառ է դարձել տեղի 19-ամյա բնակիչ Ալի Իսմայիլ Քորքմազի մահը։ Երիտասարդը  հունիսի 2-ին տեղի ունեցած անկարգությունների հետևանքով վնասվածքներ էր ստացել ու 38 օր անց մահացել  հիվանդանոցում։

http://www.tert.am/am/news/2013/07/12/turkey-protests/