Ներկայիս Թուրքիայի տարածքում գտնվող Սղերթ շրջանի Էրուհ քաղաքի Դըհ թաղամասում հայկական եկեղեցու տարածքը վաճառվել է գյուլենական համայնքին:
Այս մասին տեղեկացնում է Թուրքիայում գործող «Այքըրը դողրուլար» լրատվական կայքի հայազգի լրագրող Ջևաթ Սինեթը:
Էրուհի Սուրբ Հովհաննես հայկական եկեղեցու տարածքը տեղի քաղաքապետարանը վերջնականապես վաճառել է Գյուլենի շարժմանը մոտ կանգնած ընկերությանը:
Գործարքին մասնակցել են Սղերթի նահանգապետն ու Էրուհի քաղաքապետը: Ըստ նույն աղբյուրի` տարածքը վաճառվել է նախատեսվածից ցածր արժեքով: Վաճառված հողակտորը ներկայացվել է որպես կանաչ գոտի, այլ ոչ պատմամշակութային տարածք: Նախատեսվում է տարածքում հյուրատուն կառուցել:
Նշենք, որ վաճառքի մասին տեղեկություններն ավելի վաղ էին տարածվել, սակայն գործարքը վերջնականապես կնքվել է օրերս:
Այժմ Սուրբ Հովհաննես եկեղեցուց միայն պատերի որոշ հատվածներ են մնացել: Այնուամենայնիվ, հայկական եկեղեցի ամեն տարի ապրիլ ամսին ուխտավորներ են այցելում, և այն շարունակում է որպես սրբավայր մնալ:
Աղբյուր` «Թուրգագիտական պորտալ»
allTurkey.am
Leave a Reply