Կոչ Սուրբ Կիրակոսից

Սուրբ Կիրակոս եկեղեցու հավելյալ կառույցների բաժինը օգտագործելու են որպես Դիարբեքիրում կառուցվելիք քաղաքի թանգարանի Հայկական մշակույթի և արվեստի բաժնի ցուցասրահ: Եկեղեցու ղեկավարությունը կոչ է արել դիարբեքիրցի հայերի վերաբերյալ փաստաթղթերն ու առարկաներն նվիրել իրենց: Քաղաքապետարանը հոգալու է քաղաքային թանգարանի եկեղեցում տեղակայված ցուցասրահի ծախսերը: 

2012 թ. վերանորոգումից հետո հավատցյալների առջև իր դռները բացած Սուրբ Կիրակոս եկեղեցու հավելյալ կառույցները օգտագործելու են Դիարբեքիրում կառուցվելիք Դիարբեքիր քաղաքային թանգարանի հայկական մշակույթի և արվեստի բաժնի ցուցասրահ: Եկեղեցու վաքըֆի և քաղաքապետարնի միջև ստորագրված պայմանագրի համաձայն՝ Ջեմիլ փաշա իջևանատանը կառուցվելիք Դիարբեքիր քաղաքի թանգարանի մի բաժինը գործելու է Սուրբ Կիրակոս եկեղեցու հավելյալ կառույցներում, որտեղ ցուցադրվելու է Դիարբեիքիրում հայերի կենսակերպը արտացոլող պատմական առարկաներ, փաստաթղթեր և տեքստեր: Եկեղեցու վաքըֆի ղեկավարությունը բոլոր շահագրգիռ անձանց կոչ է արել    իրենց հանձնել Դիարբեքիրի հայերի վերաբերյալ ձեռքի տակ եղած պատմական  անգին նմուշները՝ դիարբեքիրցի հայերի կենսաձևի վերաբերյալ ցանկացած լուսանկար, առարկա, փաստաթղթեր:

Աջակցություն քաղաքապետարանից

Ինչպես տեղեկացրեցին Սուրբ Կիրակոս եկեղեցու վաքֆի նախագահ Վարդգես Էրգյուն Այըքն ու եկեղեցու ղեկավարներից Փելին Այըքը, ստորագրված արձանագրության համաձայն՝ վաքըֆից թույլտվություն ստանալու պայմանով եկեղեցում և հավելյալ կառույցներում համերգ, ցուցադրություն, այլ մշակութային միջոցառումներ և հարցազրույց վարելու հնարավորություն է ապահովում: Նմանատիպ միջոցառումներից ստացած եկամուտը եկեղեցու վաքֆի համար մշտական եկամտի աղբյուր կարող է լինել: Համաձայն քաղաքապետարանի և վաքֆի միջև ստորագրված պայմանագրի՝ եկեղեցու կազմում գտնվող քաղաքի թանգարանի բաժնի ծախսերը հոգալու է քաղաքապետարանը: Բացի այդ` քաղաքապետարանը հոգալու է նաև եկեղեցու մաքրության և անվտանգության հարցը՝ ազատելով վաքֆին այդ ծախսերից:

1 միլիոն լիրա պարտք

Սուրբ Կիրակոս եկեղեցու վաքֆի ղեկավար խորհրդի նախագահ Վարդգես Այըքը «Ագոս» թերթին հայտնել է, որ եկեղեցու վերանորոգումն ու վերաբացումը ողջ աշխարհի դիրաբեքիրցիների համար ուրախության աղբյուր է դարձել, սակայն մատակարար ֆիրմային դեռևս պարտք են, սպասում են աջակցության: Վերանորոգման և մատակարար ֆիրմային վճարելու գումարը կազմել է 5 միլիոն 900 հազար լիրա, սակայն հետագայում 20 % զեղչ է  կատարվել՝ գումարն իջեցվելով 4 միլիոն 800 հազար լիրայի: Այըքը հայտնել է, որ այս գումարից վճարել են միայն 3 միլիոն 780 հազարը, մինչդեռ 1 միլիոն 20 հազար լիրա պարտք են մնացել: Այըքը նաև ասել է, որ այս գումարը վճարելու համար ֆինասական աղբյուրներ են փնտրում, ողջ հայ համայնքի և բարեգործների օգնության կարիքն ունեն:   

Սպասվում է օգնություն

Ըստ Փելին Այըքի՝ պարտքը վճարելու համար առաջիկայում Նյու Յորքում բարեգործական ճաշկերույթ է կազմակերպվելու: Ստամբուլում ևս մի շարք միջոցառումներ են կազմակերպվելու: Այըքը նաև շեշտել է, որ եկեղեցու վաքըֆը ոչ միայն նյութական, այլև մարդկային աջակցության կարիք ունի. Իրենց աշխատանքն ու ժամանակը տրամադրող մարդկանց առաջ մեր դռները միշտ բաց են:

Վերադարձվել է 17 անշարժ գույք

Վարդգես Էրգյուն Այըքը, նշել է, որ Սուրբ Կիրակոս եկեղեցում պատրիարքարանի հոգևոր հովիվ նշանակելու դեպքում, քաղաքի և շրջակայքի հայերի ու կրոնափոխ հայերի և եկեղեցու հարաբերություններն ավելի սերտ կլինեն, արդյունքում եկեղեցու կանգուն մնալու ամուր երաշխիք կհանդիսանա: Վարդգես Այըքի փոխանցմամբ վերջին շրջանում Վաքֆերի գլխավոր խորհրդի որոշմամբ Սուրբ Կիրակոս վաքֆին են վերադարձրել 17 անշարժ գույք: Վարդգես Այըքը, նշելով, որ եկեղեցու պարտքը վճարելու համար չեն ցանկանում վաճառել այս անշարժ գույքը, որը հետագայում եկեղեցու ապագայի համար երաշխիք կհանդիանա, կոչ արեց մարդկանց տեր կանգնել իրենց եկեղեցիներին:

Այըքը նաև հայտնեց, որ եկեղեցու շրջակա կրպակները վերանորգելու վերաբերյալ նախագիծ են պատրաստել, որը ստացել է Հուշարձանների պաշտպանության խորհրդի աջակցությունը: Այս նախագծի համար 900 հազար լիրայի կարիք ունեն: Այն կյանքի կոչելուն պես եկեղեցին շատ ավելի մեծ եկամուտ կապահովի քան այսօր ստանում է անշարժ գույքից:

Նրանք, ովքեր իրենց ձեռքի տակ եղած նյութերը Դիարբեքիր քաղաքի թանգարանի Հայակական մշակույթի և արվեստի բաժնում ցուցադրելու համար ցանկանում են նվիրաբերել, կարող են կապ հաստատել pelin_ayik@hotmail.com հասցեով: Նվիրաբերված առարկաների սեփականության իրավունքը պատկանելու է եկեղեցու վաքըֆին:

Ռոբեր Քոփթաշ

«Ակոս» 02.07.2013  

rober.koptas@agos.com.tr