ԼՂ հարցի կարգավորումից հետո Հայաստանը կարող է օգտվել Բաքու-Թբիլիսի-Կարս երկաթուղուց. Թուրքիայի տրանսպորտի նախարար

Թուրքիայի տրանսպորտի նախարար Բինալի Յըլդըրըմը հայտարարել է, թե Հայաստանը տարածաշրջանային նշանակության նախագծերի մասնակիցը կարող է դառնալ ղարաբաղյան հարցի կարգավորումից հետո միայն:

Ինչպես հաղորդում է ադրբեջանական APA գործակալությունը, աշխատանքային այցով Ադրբեջանում գտնվող թուրք պաշտոնյան հավելել է, թե խոսքը մասնավորապես Բաքու-Թբիլիսի-Կարս երկաթուղու մասին է: «Այդ ճանապարհից Ադրբեջանից, Վրաստանից և Թուրքիայից բացի կարող են օգտվել այլ երկրներ ևս, ինչպես օրինակ Հայաստանը: Դրա համար, սակայն, Հայաստանը պետք է որոշ պարտավորություններ կատարի. ազատի ադրբեջանական բռնազավթված տարածքները, լուծի կողմերի (հայերի ու ադրբեջանցիների) միջև առկա խնդիրները, ԼՂ հարցը… Դրանից հետո, միայն, հայերը կարող են մասնակցել Արևելքին և Արևմուտքին ինտեգրվելու համատեղ նախագծերին»,- նշել է նա:

Բաքու-Թբիլիսի-Կարս երկաթուղու կառուցման նախագծի մեկնարկը տրվել է 2007թ.՝ Վրաստանի, Ադրբեջանի և Թուրքիայի միջև կնքված միջկառավարական պայմանագրի հիման վրա: Նախագծի շրջանակում կառուցվում է 98 կմ երկարություն ունեցող երկաթգիծ, որը սկսվում է Թուրքիայի Կարս քաղաքից և ավարտվում վրացական Ախալքալաքում: Ընդ որում, երկաթուղու զգալի մասը՝ 68 կմ-ը, անցնելու է Թուրքիայի տարածքով, մնացած 30 կմ-ը՝ Վրաստանի:

Սպասվում է, որ երկաթուղին ապահովելու է տարեկան 10-25 մլն տոննա բեռնափոխադրում:

Ծրագրի շրջանակում նաև վերակառուցվելու և վերաշահագործվելու է Ախալքալաք-Մարաբդա-Թբիլիսի երկաթգիծը, ինչպես նաև Ախալքալաք քաղաքում գնացքների անցակետ է կառուցվելու: Բաքու-Թբիլիսի-Կարս երկաթուղու վրացական հատվածի շինարարության և վերակառուցման համար Բաքուն Թբիլիսիին արտոնյալ պայմաններով 775 մլն ամերիկյան դոլար վարկ է տրամադրել: Առաջին մասնաբաժինը՝ 200 մլն դոլարը, հատկացվել է 25 տարի ժամկետով և տարեկան 1 տոկոս տոկոսադրույքով, երկրորդը՝ 575 մլն-ը՝ 25 տարի ժամկետով և տարեկան 5 տոկոս տոկոսադրույքով:

Հիշեցնենք, որ շաբաթներ առաջ «Ադրբեջանի երկաթուղիներ» փակ բաժնետիրական ընկերության նախագահի տեղակալ Գուրբան Նազիրովը հայտարարել էր, թե երկաթուղին ամբողջությամբ շահագործման է հանձնվելու 2014թ-ի վերջին:

http://www.tert.am/am/news/2013/07/03/nk-turkey/