«Մեծ մորս դաջվածքները» ֆիլմի ցուցադրում և հանդիպում ֆիլմի հեղինակ Սյուզան Խարդալյանի հետ

Արևմտահայոց հարցերի ուսումնասիրության կենտրոնը հուլիսի 1-ին` երկուշաբթի օրը, ժամը 18:00-ին կազմակերպեց «Մեծ մորս դաջվածքները» ֆիլմի դիտում, որին մասնակցեց նաև ներկայում Երևանում գտնվող ֆիլմի հեղինակը` Սյուզան Խարդալյանը:

Միջոցառման բացումը կատարեց Արևմտահայոց հարցերի ուսումնասիրության կենտրոնի տնօրեն Հայկազուն Ալվրցյանը, ով ներկայացրեց Սյուզան Խարդալյանին` ասելով. «Մոտ 3 տասնյակ ֆիլմերի հեղինակ, նշանավոր ռեժիսոր, անվանի մտավորական Սյուզան Խարդալյանը ողջ իր կյանքով ու ստեղծագործությամբ ծառայել է Հայ դատին: Նա բարձրացրել է ոչ միայն հայկական, այլև` համամարդկային խնդիրներ»:

Սյզուզան Խարդալյանը հայտնելով, որ իր ֆիլմերի պրոդյուսերը, ով նաև իր ամուսինն է, ևս ներկա է դահլիճում, նշեց. «Ցեղասպանության թեմայով, բացի «Մեծ մորս դաջվածքները» ֆիլմից, մենք նկարահանել ենք ևս երկու ֆիլմ: 1988 թ. «Վերադարձ դեպի Արարատ»-ը ցուցադրվեց Երևանում` լինելով Հայոց ցեղասպանության թեմայով առաջին ֆիլմը, որը նկարահանվել էր արտասահմանյան երկրում: «Վերադարձ դեպի Արարատ»-ը մեր հավաքական երազանքների մասին էր: Հաջորդը «Ես ատում եմ շները» ֆիլմն էր, որը ինչ-որ տեղ արտացոլում էր իր ժամանակը: Հիշողության և ինքնության թեման այդ շրջանում սկսել էր դուրս գալ հավաքական համատեքստից և դառնալ անհատի պատմություն: Ինչ վերաբերում է «Մեծ մորս դաջվածքները» ֆիլմին, ապա իմ մտասևեռումը միշտ եղել էր այն խնդիրը, թե ինչ Ցեղասպանության թեման ինչպես կարելի էր տեսնել հայ կնոջ ճակատագրի մեջ: Սույն թեման դեռ նոր է սկսել ակադեմիական շրջանակներում ուսումնասիրվել: Այս զգայուն խնդրին նաև դժվարությամբ են անդրադառնում անգամ հրեաները: Պատմության մեջ առաջին անգամ լինելով` Ռուանդայի ցեղասպանության համատեքստում առկա է այնպիսի օրենքներ մշակելու տրամադրություն, ըստ որոնց` պատերազմների ժամանակ ցեղասպանությունների ընթացքում կանանց դեմ կատարված բռնությունները, ոտնձգությունները և, իհարկե, բռնաբարությունները համարվեն պատերազմական հանցագործություն: Ես ուզում եմ մեր խնդիրը դնել նաև այս համատեքստի մեջ, որպեսզի մեր խնդիրը դառնա այժմեական: Հուսամ, որ այս ֆիլմը գիտնականներին կներշնչի նոր թեմաների ուսումնասիրմանը: Թեև հաճելի ֆիլմ չէ, սակայն մաղթում եմ հաճելի դիտում»:

Միջոցառման բացման խոսքից հետո ներկաները դիտեցին շուրջ մեկ ժամ տևողությամբ «Մեծ մորս դաջվածքները» ֆիլմը: Վերջինիս ցուցադրումից հետո մասնակիցները, որոնց մեծ մասը երիտասարդներ էին, գրեթե 10 րոպե չէին կարողանում հարցեր ուղղել հեղինակին` տպավորված լինելով ազդեցիկ ֆիլմով: Դիտումից միայն որոշ ժամանակ անց հեղինակը պատասխանեց ներկաներին հուզող հարցերին: Նա հաղորդեց, որ իր մեծ մայրը ծագումով եղել է ադըյամանցի, և հավելեց, որ միշտ, որպես կանոն, սույն ֆիլմի դիտումից հետո հանդիսատեսները որոշ ժամանակ չեն կարողանում անմիջապես հարցեր տալ` դեռ ֆիլմի ազդեցության տակ լինելով, սակայն այնուհետև հարցերի տարափ է սկսվում:

Նա նաև ներկաներին հայտնեց, որ այս տարի իր երևանյան այցի հենց նախորդ օրը ֆիլմը ցուցադրվել է նաև Եվրոխորհրդարանում, որտեղ կազմակերպված դիտմանը մասնակցել են շուրջ 140 հոգի, որոնց մեծ մասը պատգամավոր էր:

Akunq.net