Էրդողանն իմ համակուրսեցին է եւ նա խոստացավ օգնել. Մալաթիայի հայերի միության նախագահ

Մալաթիայի հայերի միության նախագահ Խոսրով Քյոլեթավիթօղլուն հեռուստահաղորդման ժամանակ հայտարարել է, թե Թուրքիայի վարչապետ Ռեջեփ Թայիփ Էրդողանն իր համակուրսեցին է եւ նրա հրահանգով է արագ ընթացք տրվել Մալաթիայի հայկական գերեզմանատան շինությունների վերականգնմանը։

Մալաթիայի տեղական TV Malatya հեռուստալիքով  հեռարձակվող «4-րդ ուժ» հաղորդման ժամանակ Մալաթիայի հայերի միության (HAYDER) նախագահ Խոսրով Քյոլեթավիթօղլուն պատմել է միության ստեղծման, Մալաթիայի հայկական գերեզմանատանը կառուցվող վերջին հրաժեշտի շենքի եւ պահակատան քանդման եւ վարչապետ Էրդողանի հրահանգով դրանց արագ վերականգնման մասին։

«Ստամբուլում ապրող Մալաթիայի հայերով շատ էին կարոտում Մալաթիան եւ մի օր որոշեցինք միություն ստեղծել եւ դիմեցինք միությունների հարցերով վարչություն, որտեղ էլ որոշվեց միության անունը դնել HAY, որը հայ է նշանակում եւ միացնել միություն (Dernek)   բառի առաջին մասնիկը։ Այնուհետ որպես լոգո ընտրեցինք Մալաթիայի Սուրբ Երրորդություն դռան վրայի խաչը»,-Մալաթիայի հայերի միության ստեղծման մասին պատմել է Խոսրով Քյոլեթավիթօղլուն։

Անդրադառնալով Մալաթիայի հայկական գերեզմանատան խնդրին, HAYDER-ի նախագահը նշել է, թե նախկինում հայկական գերեզմանատունն ուներ 27000 քմ տարածք, այժ մնացել է միայն 10000-ը։ Նա շեշտել է, թե չեն կարողացել գտնել համապատասխան փաստաթղթերը՝ նոր օրենքի շրջանակներում կորցրած հողերը հետ ստանալու համար։

Մալաթիայի հայերի միության նախագահը, խոսելով նախորդ տարի կառուցման փուլում գտնվող Մալաթիայի հայկական գերեզմանատան վերջին հրաժեշտի շենքի (մատուռ) եւ պահակատան քանդման մասին, նշել է, թե քանդված շենքերի արագ վերականգմանը նպաստել է վարչապետ Ռեջեփ Թայիփ Էրդողանը, ով իր համակուրսեցին է եղել։  Վարչապետի հետ նույն կուրսում էինք սովորում։ Նա շատ լավ ֆուտբոլ էր խաղում։ Միեւնույն ժամանակ աշխատում էր Ստամբուլի քաղաքապետարանի տրասնպորտի վարչությունում։  Մի անգամ լսեցինք, որ Էրդողանին եւ Օղուզ անունով մեր մի ընկերոջը ուզում են ընդգրկեն «Ֆեներբահչե», սակայն ընտրեցին Օղուզին։ Էրդողանը շատ էր տխրել։

Երբ Մալաթիայի քաղաքապետարանից քանդել էին կառուցման փուլում գտնվող գերեզմանատան շենքերը, վարչապետ Էրդողանը զանգահարեց մեզ, հայտնեց իր ցավը կատարվածի առթիվ եւ խոստացավ, որ կվերականգնվի ամեն ինչ»,-պատմել է Խոսրով Քյոլեթավիթօղլուն։

Նշենք, որ հունիսի 29-ին տեղի է ունեցել Մալաթիայի հայկական գերեզմանատան հրաժեշտի համար նախատեսված շենքի (մատուռ) բացման արարողությունը, որին մասնակցել պատգամավորներ եւ մի շարք պաշտոնյաներ։

2012-ի փետրվարի 2-ին  Մալաթիայի քաղաքապետարանի հանձնարարությամբ քանդվել է Մալաթիայի հայերի գերեզմանոցում կառուցվող պահակատունն ու մատուռը։ Այս դեպքը բողոքի ալիք էր բարձրացրել Թուրքիայում եւ Թուրքիայից դուրս, որից հետո Մալաթիայի քաղաքապետը պնդել էր, թե շինությունները սխալմամբ են քանդել եւ խոստացել պետության հաշվին վերականգնել վնասը:

http://news.am/arm/news/160617.html