Մերսինում ցույցերի ժամանակ մոտ 20 մարդ է վիրավորվել

Թուրքիայում շարունակվող հակակառավարական ցույցերի հերթական թեժ կետը եղել է Մերսին քաղաքը։

500 հոգանոց խումբը փորձել է հավաքվել քաղաքի կենտրոնում՝ աջակցություն հայտնելու Գեզի զբոսայգու հետ կապված բողոքի ակցիայի մասնակիցներին։

Ոստիկանները թույլ չեն տվել, որպեսզի խումբն ակցիա անցկացնի, ինչի հետևանքով բախումներ են սկսվել։

Բախումների ժամանակ շուրջ 20 մարդ վնասվածք է ստացել. տուժել են ինչպես ցուցարարներ, այնպես էլ ոստիկաններ ու լրագրողներ։ 10-ից ավել ցուցարար ձերբակալվել է, տեղեկացնում է CNNTurk-ը։

Ոստիկանները մեծ քանակությամբ արցունքաբեր գազ են օգտագործել, ինչից հետո ցույցը սկսել է ցրվել։

Նշենք, որ արդեն մեկ ամսից ավել է, ինչ Թուրքիայում շարունակվում են հակակառավարական ելույթները, որոնք սկիզբ առան Ստամբուլի Գեզի զբոսայգին ծառահատումից և կառուցապատումից պաշտպանելու նպատակով ակցիայից։ Ցույցերի ընթացքում գրանցվել է մահվան 3 դեպք, հազարավոր ձերբակալվածներ ու վիրավորներ։ Ներկայում հակակառավարական ալիքը կորցրել է իր նախկին ուժգնությունը, սակայն դեռ ամբողջովին չի մարել։

http://haynews.am/hy/1372662440