«Վանա ծովուն արշալույսը»` Սանկտ Պետերբուրգում

Սանկտ Պետերբուրգի հայ համայնքի մշակույթի կենտրոնում նոյեմբերի 27-ին տեղի է ունեցել վերջերս նկարահանված «Վանա ծովուն արշալույսը» գեղարվեստական կինոնկարի ցուցադրությունը: Ինչպես Սանկտ Պետերբուրգից հաղորդում է «Արմենպրես»-ի թղթակիցը, կինոնկարի մտահղացման, դերասաների ընտրության, նկարահանումների աշխարհագրության, ֆիլմի բովանդակության որոշ մանրամասներ է պատմել կինոնկարի ռեժիսոր և սցենարիստ Արմեն Վաթյանը: Ապա, հանդիպման մասնակիցներին ներկայացվել է ամերիկահայ ընտանիքի մասին պատմող կինովեպը, որի հերոսները տարբեր ժամանակների ներկայացուցիչներ են և կյանքի, ավանդույթների, արժեքների վերաբերյալ ունեն հակասական վերաբերմունք, բայց սերում են գենետիկական նույն արմատից:

Հանդիսատեսը գլխավոր հերոսի մտորումներից կռահում է, որ այդ գերդաստանում դեռ պահպանվում են Եղեռնի սարսափների հիշողությունները, նաև’ կորցրած հայրենի օջախը վերադառնալու,վերագտնելու հույսերը: Կինոնկարի հեղինակը միգրանտի կարգավիճակում հայտնված հայ ընտանիքում տիրող փոխհարաբերությունների միջոցով վերհաստատում է այն ճշմարտությունը, որ հայ մարդը, որտեղ էլ որ նա ապրելիս լինի, չի մոռանում իր ինքնության մասին, հոգու խորքում փայփայում է Հայրենիքի կարոտը, խնամքով Է վերաբերվում ավանդույթներին, ազգային արժեքներին:

Հանդիսականները ջերմ ծափահարություններով են ուղեկցել կինոնկարի ավարտը` շնորհավորելով հեղինակին բարձարվեստ ֆիլմ ստեղծելու համար եւ ստեղծագործական նոր բարձրունքներ ցանկացել նրան:

http://armenpress.am/arm/news/670222/Վանա_ծովուն_արշալույսը%60_Սանկտ_Պետերբուրգում.html