Սեւրում հրավիրվող համագումարը՝ հիմնազուրկ

Դեկտեմբերի 10-ին Փարիզի Սեւր արվարձանում հրավիրվելու է «Արեւմտահայոց երրորդ համագումարը», որի նախաձեռնող խմբի ներկայացուցիչ Կարեն Միքայելյանին սկզբում հավատով են վերաբերվել մի շարք հայրենակցական միություններ` «Վան-Վասպուրական», «Վասպուրականի նոր սերունդ», «Թվանջ», «Արաբկիր», «Խարբերդ», «Տրաբզոն-Արդվին-Բաթում», «Մուսալեռ», «Հաճըն», «Կարին», «էրզրում» եւ այլն:

Սակայն այս միությունները գտնում են, որ նույն Կարեն Միքայելյանի` Սեւրի հանդիպմանը ներկայացնելիք զեկույցում կա «թյուր կարծիք, թե իբր Հայաստանի Հանրապետությունը ազնվազն տեսանելի ապագայում ի վիճակի չէ ստանձնելու արեւմտահայության ճակատագրին եւ ապագային առնչվող յուրահատուկ խնդիրների, հատկապես պահանջատիրության լուծման առաքելությունը»:

Հիշատակված կազմակերպությունների ներկայացուցիչները ստորագրել են մի հայտարարություն, որով հիմնազուրկ է որակվում Սեւրում հրավիրվող համագումարը:

Ստորեւ ներկայացնում ենք նաեւ հայտարարությունը:

Հայտարարություն

Մենք` Արեւմտյան Հայաստանի տարբեր բնօրրանները ներկայացնող, Հայաստանի Հանրապետությունում գրանցված եւ գործող Հայրենակցական միություն հասարակական կազմակերպությունների ղեկավարներս եւ Արեւմտահայերի ժառանգների համագումարի նախապատրաստման հայաստանյան կազմկոմիտեի ներքոստորագրյալ անդամներս,

– հավատարիմ մնալով մեր միացյալ ՀԱՅՐԵՆԻՔԸ ազատագրված տեսնելու անսակարկելի ձգտմանը,

– վերահաստատելով այդ նպատակի համար հետեւողականորեն պայքարելու մեր անկոտրում կամքը՝ մեր մտահոգությունն ենք հայտնում հետեւյալի կապակցությամբ.

ա) 2011 թվականի դեկտեմբերի 10-ին Փարիզում (Սեւրում) նախատեսված «Արեւմտահայերի երրորդ համագումար» անվանումով ժողովի հրավիրումը հիմնազուրկ է ոչ միայն իրավական առումով, այլեւ անհեռանկար` արդյունավետության տեսանկյունից: Իսկ միեւնույն նպատակը հետապնդող այլ կազմակերպությունների բացակայության պայմաններում նշված համագումարի հրավիրման նման նախաձեռնությունը դառնում է անտրամաբանական, հղի մի շարք անթույլատրելի հետեւանքներով:

բ) Հստակեցված չեն նշյալ ժողովի ժամանակ, այսպես կոչված, «Ազգային խորհրդի գործադիր մարմնի» ընտրության կարգն ու համամասնությունը, ինչպես նաեւ այդ մարմնի կազմը, լիազորությունների շրջանակն ու գործունեության առանցքային ուղղությունները:

գ) Անօրինական է վերոհիշյալ ժողովի ժամանակ, այսպես կոչված, «2012-2013 թթ. գործողությունների ծրագրի» ընդունումը, քանի որ չի արժանացել լայն եւ հանգամանալից քննարկման, եւ հայտնի չեն նրա հեղինակներն ու նպատակները:

Հաշվի առնելով վերոշարադրյալը, ինչպես նաեւ բազմաթիվ այլ մտահոգություններ` մենք` կազմկոմիտեի անդամ ներքոստորագրյալներս, ներկա փուլում եւ տվյալ իրավիճակում առանց նշյալ մտահոգությունների փարատման, վերը նշված ժողովի-համաժողովի-համագումարի հրավիրումը համարում ենք աննպատակահարմար:

Միեւնույն ժամանակ հայտարարում ենք, որ որեւէ մեկը լիազորված չէ Հայաստանը ներկայացնելու 2011 թ. դեկտեմբերի 10-ին Փարիզում (Սեւրում) նախատեսված ժողովին: Որեւէ անհատի կամ անհատների խմբի մասնակցություն նշյալ ժողովին մեր կողմից կդիտարկվի ինքնագործունեություն եւ լիազորություններ չունեցող:

26-11-2011

«ԱԶԳ» ՕՐԱԹԵՐԹ #214