Երբ Թուրքիայի պատմական ընկերության նախկին նախագահ, Ազգայնական շարժում կուսակցության պատգամավոր Յուսուֆ Հալաչօղլուն ելույթ է ունենում կոտորածների և ցեղասպանության թեմայով, ապա դժվար է հասկանալ, նա թուրքական ազգայնական տեսակետն է պաշտպանում, թե նոր «փոս» է փորում թուրքական ժխտողականության համար: Հալաչօղլուն քննադատել է վարչապետ Էրդողանին այն հարցում, որ նա պետության անունից ներողություն է խնդրել Դերսիմի կոտորածների համար:
«Վարչապետն անձ է և չի կարող ներողություն խնդրել պետության անունից: Եթե նրա պապն արած լիներ, ապա կարող էր որպես անձ ներողություն խնդրել: Իսկ պետության անունից կարող է ներողություն խնդրել միայն այն դեպքում, երբ հարցը քննարկվի խորհրդարանում և որոշում կայացվի»,-ասել է Հալաչօղլուն:
Այս պահի դրությամբ Հալաչօղլուն միակ մարդն է Թուրքիայում, ով ճիշտ ճանապարհն է ցույց տալիս, թե ինչպես պետք է վարվել Դերսիմի և ինչու ոչ` Հայոց ցեղասպանության պատմական փաստերի հետ: Վարչապետի ներողությունը հարցի լուծում չէ: Խնդիրը պետք է քննարկվի խորհրդարանում, օրենքի ուժ ստանա, այնուհետ միայն ներողություն հայցվի պետության անունից: Առանց օրենսդրական հիմքի՝ պետության ներողությունը ոչ մի հետևանք չի կարող ունենալ կոտորածների ենթարկված ընտանիքների և նրանց ժառանագների համար: Իսկ խորհրդարանի որոշման դեպքում անմիջապես առաջանում է փոխհատուցման և վերաբնակեցման խնդիրը, ինչն այսօր պահանջում են դերսիմցիները: Հալաչօղլուն ճիշտ ժամանակին և ճիշտ ուղղությամբ է ուղղորդում Դերսիմի դեպքերին հետամուտ քաղաքական ուժերին և անհատներին: Նա հուշում է, որ պետք է անպայման խորհրդարանի որոշում ստանալ, այլապես անիմաստ են դառնում և ներողությունները և դատապարտումները: Հալաչօղլուի այս տեսակետը պետք է հաշվի առնել նաև 1915-ի հայերի ցեղասպանության հրապարակավ քննարկումների ժամանակ: Այնպես չստացվի, որ վարչապետը ներողություն խնդրի 1915թ-ի կոտորածների համար, ինչպես Դերսիմի դեպքում, և այն չհաջորդի Թուրքիայի խորհրդարանի համապատասխան որոշմանը:
Armweeklynews.am 26.11.11
Leave a Reply