«Զիս գործերուս մեջ փնտրեք»

Սաթենիկ Մելքոնյան

Այս տարվա հոկտեմբերի 13-ին լրացավ Հակոբ Մնձուրու 125-ամյակը: Այս առիթով Ազգային գրադարանի հանրության հետ կապերի եւ միջոցառումների կազմակերպման բաժինը երեկ ձեռնարկել էր գրողին նվիրված միջոցառում: Ցուցադրված էին Մնձուրու եւ նրա մասին ստեղծագործություններ` հայերենով եւ թուրքերենով: Միջոցառմանը ներկա էին Գրողների միության կողմից գլխավոր բանախոս Արթուր Անդրանիկյանը, գրողներ Արսեն Ճանյանը, Արտաշես Ղազարյանը, Սաթենիկ Ավետիսյանը եւ այլք: Մասնակցում էին նաեւ Մ. Աբեղյանի անվան դպրոցի 10-րդ դասարանի աշակերտները:

Բանասիրական գիտությունների թեկնածու Արթուր Անդրանիկյանը ցավով նշում է, որ տպագրվել է Մնձուրու գործերի 20-25 տոկոսը միայն, եւ եթե այսօր տպագրելու լինենք նրա մնացած գործերը եւս, դրանք կվերածվեն հատորաշարի:

Հակոբ Մնձուրին ծնվել է 1886-ին Երզնկայի Իլիչ գավառի Արմտան գյուղում: Ավարտել է Ստամբուլի Ռոբեր քոլեջը: Ծննդավայրում զբաղվել է երկրագործությամբ եւ ուսուցչությամբ: 1914-ին Մնձուրին մեկնում է Պոլիս եւ վերադարձին 25 րոպե ուշանալով շոգենավից` չի կարողանում ծննդավայր վերադառնալ: Այդ ընթացքում սկսված ջարդերին զոհ է գնում նրա ընտանիքը: Եվ նա մնում է Պոլսում:

Գրող Արսեն Ճանյանը անձկությամբ հիշում է Մնձուրու հետ իր հետ առաջին հանդիպումը. «Նրանից միայն մի պատմվածք էի կարդացել, բայց իմ երեւակայության մեջ հորինվել էր որպես մեծ նահապետ: Երբ բեմին տեսա գրողին, զարմացա որ այդ փոքրամարմին մարդու համար այդքան մարդ էր հավաքվել: Այդ օրից տասը տարի անցավ, եւ մենք կրկին հանդիպեցինք: Ես դպրոցկան էի, նա` 70 տարեկան, չնայած դրան մենք մտերմացանք: Այսպես իմ մեջ եղած սերը ավելի աճեց», պատմեց Արսեն Ճանյանը:

Միջոցառման վերջում գրականության ուսուցչուհի Կարինե Շտիկյանը ցավով նշեց, որ դպրոցական ծրագրում Մնձուրուն ծանոթանում են միայն ակնարկի ձեւով, մինչդեռ գրողին կարդալով` կկրթվի հայրենասեր սերունդ:

Հակոբ Մնձուրու «Արմտան. Եփրատի մյուս կողմը» եւ «Ստամբուլյան հուշեր» գրքերը Սիլվա Գույումջյանը թարգմանել է թուրքերեն:

26-11-2011

«ԱԶԳ» ՕՐԱԹԵՐԹ #214