Թուրքական «Թարաֆ» թերթի սյունակագիր Ահմեդ Ալթանը (Ահմեդ Ալթանը «Թարաֆ»-ի գլխավոր խմբագիրն է-Ակունքի խմբ.) «Էրդողանն ու պատմությունը» հոդվածում գրում է, որ պետության անունից ներողություն խնդրելով Դերսիմի կոտորածների համար` փաստորեն, վարչապետ Ռեջեփ Թայիբ Էրդողանը «պատռում է Թուրքիայի պաշտոնական պատմությունը»:
Ինչպես հաղորդում է «Արմենպրես»-ը, թուրք սյունակագիրը նշում է, որ իշխող «Արդարություն եւ զարգացում» կուսակցության (ԱԶԿ) ակտիվի առաջ ելույթում Էրդողանը Թուրքիայի ամենաարյունալի մեղսագործություններից մեկի կապակցությամբ հայտնել է, որ կոտորածների համար պետության կողմից «ապստամբության» պատրվակի օգտագործումը միանգամայն շինծու է եղել:
«Էրդողանը քաջություն ցուցաբերեց առերեսվելու սեփական պետության պատմության գաղտնի պահվող երեսներից մեկի հետ, ինչը թուրքական հանրության առաջ մաքրվելու նոր ճանապարհներ կբացի: Թուրքիայում պատմությունը խեղաթյուրվել է, ինչը բացասական ազդեցություն է գործում թուրքական հասարակության այսօրվա եւ ապագայի վրա: Էրդողանի` Դերսիմի կոտորածների մասին երեկ արած հայտարարությունը պատռում է պաշտոնական պատմությունը եւ հասարակության համար իրական պատմություն ունենալու առիթ ստեղծում: Միայն այդ դեպքում թուրքական հասարակութունը կկարողանա ձերբազատվել Աթաթուրքի դիկտատուրայի ամբողջ ամոթալի հանցագործություններից», -«Թարաֆ»-ում գրում է Ալթանը:
Թուրքական զինուժը 1938-1939 թթ. Աթաթուրքի թույլտվությամբ Դերսիմի ալեւի, քուրդ եւ ոչ մահմեդական, այդ թվում` նաեւ հայ բնակչության նկատմամբ կոտորած է իրագործել, որի արդյունքում պաշտոնական տվյալներով 13806 մարդ, իսկ ոչ պաշտոնական տվյալներով’ 100 հազարից ավելի մարդ է սպանվել:
24.11.2011
Armenpress.am
Leave a Reply