Տէրսիմի կոտորածներուն համար ներողութիւն խնդրած Էրտողանը քննադատութեան կ’արժանանայ

Թրքական պատմական ընկերութեան նախկին նախագահ, “Ազգայնական շարժում” կուսակցութենէն պատգամաւոր Եուսուֆ Հալաչօղլու կոշտ քննադատութեան ենթարկած է Թուրքիոյ վարչապետ Ռեճեփ Թայիփ Էրտողանը՝ այն պատճառով, որ վերջինս պաշտօնապէս ներողութիւն խնդրած է Տէրսիմի կոտորածներուն համար:

“Ան կրնար ներողութիւն խնդրել, եթէ ատիկա անոր մեծ հայրը ըրած ըլլար: Սակայն կառավարութեան անունով նման բան չեն յայտարարեր”,– ըսած է Հալաչօղլու` նշելով, որ պետութեան անունով ներողութիւն խնդրելու համար նախ անհրաժեշտ է խորհրդարանին դիմել:

“Այդ ինչպէս կը պատահի, որ “Եկէք Հայկական հարցը ձգենք պատմաբաններուն” յայտարարող վարչապետը կը ներկայացնէ Տէրսիմի դէպքերու մասին փաստաթուղթ մը եւ ներողութիւն կը խնդրէ”,– նշած է Եուսուֆ Հալաչօղլու:

Յիշեցնենք, որ երէկ Թուքրիոյ վարչապետ Ռեճեփ Թայիփ Էրտողան պաշտօնապէս ներողութիւն խնդրած է նախկին իշխանութիւններուն կողմէ 1930ական թուականներուն Տէրսիմի մէջ յատկապէս քիւրտերու դէմ իրականացուած կոտորածին համար:

“Եթէ հարկ է Տէրսիմի կոտորածներուն համար պետութեան անունով ներողութիւն խնդրել, ես ներողութիւն կը խնդրեմ”,– յայտարարած էր Էրտողան:

 24.11.11

Tert.am