Թուրքիայի վարչապետ Ռեջեփ Թայիփ Էրդողանի կողմից Դերսիմի 14 հազար սպանված քրդերի համար ներողություն խնդրելը անպարկեշտություն էր: Այսօր` նոյեմբերի 24-ին, մամուլի ասուլիսում հայտարարեց ՀՅԴ բյուրոյի քաղաքական հարցերի եւ Հայ դատի գրասենյակի ղեկավար Կիրո Մանոյանը:
«Դա ոչ պարկեշտ էր Էրդողանի կողմից, քանի որ նա ասաց, որ պետք է ներողոթյուն խնդրի այն ժամանակվա միակ կուսակցությունը՝ «Ժողովրդահանրապետական» կուսակցությունը: Այնպես ներկայացրեց, թե կուսակցությունն անկախ պետությունից գնաց եւ սպանդ արեց:
Այնինչ թե Հայոց ցեղասպանության դեպքում, թե Դերսիմում կատարվածի համար պատասխանատուն Թուրքիայի պետությունն է»,- հայտարարեց նա:
Կիրո Մանոյանի ներկայացմամբ, Թուրքիան փորձում է տարածաշրջանին բացատրել, թե որն է ժողովրդավարությունը, բայց իրականում, ինքն է խախտում այդ ժողովրդավարությունը:
Անդրադանալով հայ-թուրքական արձանագրություններին, Կիրո Մանոյանը հիշեցրեց, որ վերջին շրջանում մի շարք թուրք պաշտոնյաներ, մասնավորապես, Թուրքիայի խորհրդարանի արտաքին հարաբերությունների հանձնաժողովի նախագահը Բաքվում հայտարարեց, թե չեն ստորագրի այդ արձանագրությունները:
«Թուրքիայի նախագահն էլ Լոնդոնում ասաց, թե արձանագրությունները սառած են, բայց մեռած չեն: Նա ասել է. «Այնքան սառած է, որ պարզ փչելով` չեն հալվի»: Բայց եթե այդքան սառած էին, ինչո՞ւ արձանագրություններ ստորագրեցինք: Սա ապացուցում է, որ պետք է հետ վերցնենք մեր ստորագրությունը: Այս ձեւով արձանագրությունները վտանգավոր են: Մենք դրանով միայն բավարարում ենք արեւմյան մի քանի բարեկամների»,- ընդգծեց դաշնակցական գործիչը:
24.11.2011
Leave a Reply