Ֆրանսիայի Սենատը կքննարկի Հայոց ցեղասպանության ժխտումը քրեականացնող օրինագիծը

Ֆրանսիայի Սենատը պատրաստվում է քննարկել Հայոց ցեղասպանության ժխտումը քրեականացնող օրինագիծը:

Թուրքական լրատվամիջոցները հաղորդում են, որ օրինագիծը Սենատի օրակարգ է բերվել սոցիալիստների կուսակցությունից հայազգի սենատոր Ֆիլիպ Կալտենբախի նախաձեռնությամբ:

Իր բլոգում Կալտենբախը հիշեցրել է, որ Ֆրանսիայի նախագահ Նիկոլա Սարկոզին եւ Ֆրանսուա Հոլանդը, որը 2012-ին նախագահական ընտրություններին ներկայացնելու է Սոցիալիստական կուսակցությունը, խոստացել են աջակցել օրինագծի ընդունմանը:

«Ֆրանսիայում Հայոց ցեղասպանության փաստի ցանկացած ժխտում հարված է` ուղղված հանրապետության արժեքներին»,-գրել է հայազգի սենատորը:

Եթե օրինագիծն արժանանա ֆրանսիական Սենատի հավանությանը, եւ Սարկոզին ստորագրի այն, Ֆրանսիայի տարածքում Հայոց ցեղասպանությունը ժխտողները  կդատապարտվեն 5 տարվա ազատազրկման եւ կտուգանվեն 45 հազար եվրոյով:

Հիշեցնենք, որ Հայոց ցեղասպանության ժխտումը քրեականացնող օրինագիծը Ֆրանսիայի Ազգային ժողովի կողմից ընդունվել է դեռ 2006-ին:

http://henaran.am/?p=53885