Նյու Յորքի և Օքսֆորդի Berghahn books հրատարակչության կողմից լույս է տեսել Հայոց ցեղասպանությանը նվիրված հայ և թուրք հեղինակների համատեղ գիրքը: Գիրքը կոչվում է «Դատաստան Ստամբուլում: Հայոց ցեղասպանության դատավարությունները»: Գրքի համահեղինակներն են Ցեղասպանության հայտնի գիտնականներ հայազգի պրոֆեսոր Վահագն Դադրյանը և թուրք պատմաբան Թաներ Աքչամը: Սա նրանց առաջին համատեղ գիրքն է: Խոսելով գրքի մասին` Դադրյանը նշել է. «Սա շատ կարևոր գիրք է: Առաջինը, այն հիմնված է այնպիսի փաստաթղթերի վրա, որոնք Օսմանյան կայսրությունը ստիպված էր ի ցույց դնել դատավարությունների ժամանակ: Երկրորդը, այն նման չէ Ցեղասպանությանը նվիրված մյուս գրքերին, քանի որ այն հիմնված է Օսմանյան բարձրաստիճան պաշտոնյանների երդմամբ տված վկայությունների վրա: Այս իմաստով գիրքը կարող է համարվել որպես իրավական փաստաթուղթ Հայոց ցեղասպանության ուսումնասիրության գործում»: Աքչամը` գրքի համահեղինակը, նշել է, որ «Իրենց հետազոտությունների ժամանակ բացահայտվել է, որ կառավարության նշած 12 դատավարություններից բացի եղել են ևս 63 դատավարություններ: Առաջին անգամ մնացած դատավարությունները քննելու համար այդ շրջանում հրատարակված օսմանյան թերթերն են օգտագործվել»: Հեղինակները գիրքը համարում են հիմնական աղբյուր պատմաբանների, քաղաքագետների, սոցիոլոգների և այն մարդկանց համար, ովքեր հետաքրքրված են Ցեղասպանության ուսումնասիրություններով:
24.11.2011
HayNews.am
Leave a Reply