Հ. Շարամբեյանի անվան ժողովրդական ստեղծագործության կենտրոնում կայացավ «Հայ գորգագործական մշակույթը» խորագրով հանրապետական գիտաժողով, որն անդրադարձավ հայ ժողովրդի պատմամշակութային ժառանգության ուսումնասիրման ու արժեւորման հարցում առաջնային նշանակություն ունեցող` ՀՀ թանգարաններում պահվող հայոց ժողովրդական կիրառական-գեղազարդման արվեստին վերաբերող արժեքներին, մասնավորապես գորգերին ու գորգագործությանը` որպես ազգային ինքնության ու ավանդույթների յուրահատուկ կրողների:
ՀՀ մշակույթի նախարարության եւ Ժողովրդական ստեղծագործության կենտրոնի նախաձեռնությամբ ընթացող գիտաժողովին հնչեցին երկու տասնյակ զեկուցումներ` հայոց գորգագործական մշակույթի ծագումնաբանության հիմնահարցերը, հայոց ոստայնագործական մշակույթի առանձնահատուկ տեսակի` գոբելենի ծագումնաբանությունը, հայկական զարդարվեստի երկրաչափական մոտիվների ու դրանց արդի կիրառության հարցերը եւ այլն:
Գիտաժողովի օրերին գործում էր նաեւ «Գորգը` ինքնության վկայագիր» խորագրով ցուցադրությունը` Հովհ. Շարամբեյանի անվ. ժողովրդական ստեղծագործության կենտրոնի գորգերի հավաքածուից:
Գիտաժողովը բացեց ժողովրդական ստեղծագործության կենտրոնի տնօրեն Հովիկ Հովեյանը: Ողջույնի խոսքով հանդես եկան ՀՀ մշակույթի նախարարի տեղակալ Արթուր Պողոսյանը, ՀՀ ԳԱԱ Հնագիտության եւ ազգագրության ինստիտուտի տնօրեն Պավել Ավետիսյանը, ՀՀ ԳԱԱ Արվեստի ինստիտուտի տնօրեն Արարատ Աղասյանը :
23-11-2011
«ԱԶԳ» ՕՐԱԹԵՐԹ #211
Leave a Reply