Թուրքիայի իշխող Արդարություն եւ զարգացում կուսակցության (ԱԶԿ) անդամ պատգամավոր Մեհմեդ Մեթիները խորհրդարանին առաջարկել է փոխել Աթաթուրքի որդեգիր հայ աղջկա՝ Թուրքիայի առաջին կին ռազմական օդաչու Սաբիհա Գյոքչենի անունը կրող Ստամբուլի օդանավակայանի անվանումը:
Ինչպես հաղորդում է «Արմենպրես»-ը, վկայակոչելով թուրքական «Թարաֆ» թերթը, ԱԶԿ պատգամավորն առաջարկել է ստեղծել նաեւ խորհրդարանական հանձնաժողով, որը պետք է ուսումնասիրի 1938-1939 թթ. Դերսիմում տեղի ալեվիականների եւ ոչ մահմեդականների դեմ թուրքական զինուժ օգտագործելու իրադարձությունները, որոնց ընթացքում 30 հազարից ավելի մարդիկ են զոհվել:
«Սաբիհա Գյոքչենը Թուրքիայի համար խորհրդանիշ է: Ստամբուլի` նրա անվան օդանավակայանում նրա մասին բերված տեղեկագրի թուրքերեն մասում բացահայտ նշվում է, որ նա ռմբակոծել է Դերսիմը, իսկ անգլերեն մասում այդ մասին ոչինչ չի հիշատակվում: Դա սկանդալ է, քանի որ, եթե անգլերեն մասում գրվեր, որ 1939 թ. նա է ռմբակոծել Դերսիմը, օտարերկրացիները հարց կտային, թե ինչու է ազգային հերոս օդաչուն ռմբակոծել սեփական երկիրը: Այդ փաստը օդանավակայանի անունը փոխելու համար կարեւոր պատճառ է: Նշանակում է՝ Սաբիհա Գյոքչենի անցյալը եւ Աթաթուրքի թույլտվությամբ Դերսիմում ստանձնած նրա կամավոր պարտավորությունը շատ հեռու է պաշտպանության արժանանալուց, որ օտար ճանապարհորդներին նրա մասին մի բան է ասվում, իսկ Թուրքիայի Հանրապետության հայրենակիցներին՝ այլ բան», -ընդգծում է ԱԶԿ պատգամավորը:
«Իմ այդ առաջարկությանը շատերը հակադարձում են, թե կարո՞ղ եք փոխել նաեւ Սաբիհա Գյոքչենին Դերսիմ ուղարկած Աթաթուրքի անվամբ կոչված վայրերի անվանունները: Եթե դրա ուժը չունեք, ի՞նչ եք ուզում այդ խեղճ հայ աղջկանից: Նրանք պնդում են, որ Սաբիհա Գյոքչեն օդանավակայանի անունը փոխել՝ կնշանակի փոխել Աթաթուրքի անունը»,-լրագրողներին ասել է ԱԶԿ պատգամավորը:
22.11.2011
Armenpress.am
Leave a Reply