Թուրքիայի Ազգային փոքրամասնությունների վաքըֆները դիմել են 1410 անշարժ գույքեր վերադարձնելու համար: Դրանցից 181-ի համար դրական պատասխանել է տրվել, իսկ 347-ի համար` բացասական: 893 դիմում էլ մերժվել է: Ինչ վերաբերում է երրորդ անձանց փոխանցված գույքերի վերադարձին, ապա նման դիմումով հանդես է եկել ընդամենը մեկ վաքըֆ:
«Միլիյեթ» օրաթերթի փոխանցմամբ` վերոբերյալ տեղեկությունները հաղորդել է Թուրքիայի փոխվարչապետ Բյուլենթ Արընչը: Վերջինս նաև հայտնել է, որ 893 անշարժ գույքերի դիմումները մերժվել են, որովհետև փաստաթղթեր չեն ներկայացվել: Արընչը նաև նշել է, որ 2011 թ. օգոստոսին հրապարակված կանոնադրությամբ վաքըֆներին իրավունք է շնորհվել հետ վերցնել երրորդ անձանց փոխանցված գույքերը, սակայն 2011 թ. նոյեմբերի 15-ի դրությամբ միայն Ստամբուլում մեկ վաքըֆ է նման դիմումով հանդես եկել:
Աղբյուրը հաղորդում է նաև, որ Վաքըֆների գլխավոր վարչությունը գույքերը վերադարձնելուց բացի նաև վերանորոգում է Թուրքիայի ոչ մուսուլման քաղաքացիների կողմից օգտագործվող որոշ պաշտամունքի վայրեր: Գլխավոր վարչությունն ավարտին է հասցրել Դարդանելի Գյոքչե կղզում գտնվող Այա Նիկոլա եկեղեցու, Ստամբուլի ասորական կաթոլիկ վաքըֆին հատկացված Հաթայ նահանգի Իսկենդերուն (Ալեքսանդրետ) քաղաքի ասորական կաթոլիկ եկեղեցու, Անթաքիայի հունական կաթոլիկ եկեղեցու վաքըֆին հատկացված Հաթայ նահանգի Իսկենդերուն քաղաքի հունական կաթոլիկ եկեղեցու և Դիարբեքիրի (Տիգրանակերտ) Սուր շրջանի հայ բողոքական եկեղեցու վերանորոգումները: Նախատեսված են նաև այլ եկեղեցիների նորոգումներ:
23.11.2011
Akunq.net
Leave a Reply